حکومت نے "پی ٹی وی فلیکس" متعارف کروادیا، صارفین نے منصوبے کے آغاز کی تاریخ سے متعلق تصحیح کردی
وفاقی حکومت نے بین الاقوامی ویڈیو سٹریمنگ پلیٹ فارم نیٹ فلکس کی طرز پر پی ٹی وی فلکس متعارف کروادیا ہے، منصوبے کی بنیاد پی ٹی آئی کے دور حکومت میں اس وقت کے وزیر اطلاعات و نشریات فواد چوہدری نے رکھی تھی۔
مائیکروبلاگنگ ویب سائٹ ٹویٹر پر وفاقی وزیر اطلاعات و نشریات مریم اورنگزیب نے پی ٹی وی فلکس کے متعارف کروانے سے متعلق اعلان کرتے ہوئےاپنے بیان میں کہا کہ اس منصوبے کی بنیاد جولائی 2022 میں رکھی گئی تھی جس کو آج مکمل طور پر فعال کردیا گیا ہے، اس پلیٹ فارم کے ذریعے دنیا بھر میں صارفین پی ٹی آئی کی ساری لائبریری سے کہیں بھی بیٹھ کر لطف اندوز ہوسکیں گے۔
یادرہے کہ 23 اکتوبر2020 میں فواد چوہدری نے مائیکروبلاگنگ ویب سائٹ ٹویٹر پر پاکستان کے پہلے او ٹی ٹی ٹی وی لانچ کرنے کا اعلان کرتے ہوئے کہا تھا کہ اس حوالے سے ٹیکنالوجی کا سارا کام مکمل ہوگیا ہے، پیمرا سے نشر کیے جانے والے مواد سے متعلق گائیڈ لائنز مرتب کرنے کا کہا گیا ہے۔
پی ٹی آئی رہنما ڈاکٹر ارسلان خالد نے مریم اورنگزیب کے بیان پرردعمل دیتے ہوئے کہا کہ اس منصوبے کی تکمیل پر مریم اورنگزیب کو کریڈٹ ملنا چاہیے، تاہم ان کی جانب سے منصوبے کی آغاز کی غلط تاریخ بتانا ایک بچگانہ حرکت ہے۔
انہوں نے مزید کہا کہ اگر وہ اپنے بیان میں یہ بتادیتیں کہ منصوبہ پی ٹی آئی دور میں شروع کیا گیا اور ہم نے اس کو مکمل کیا تو اس میں ان کا کوئی نقصان نہیں ہوتا بلکہ کریڈٹ تب بھی آپ کا ہوتا ساتھ ہی آپ کو مزید میچور سمجھا جاتا۔
پی ٹی وی سے منسلک صحافی نے بھی مریم اورنگزیب کی تصحیح کرتے ہوئےکہا کہ جہاں تک مجھے یاد ہے پی ٹی وی ری لانچ کا فنکشن میں نے خود ہوسٹ کیا تھا،فواد چوہدری اس وقت وزیر اطلاعات تھے جو میرے ساتھ اس فنکشن میں موجود تھے، اس پروگرام کےتمام شرکاء جانتے ہیں کہ پی ٹی وی فلکس کی بنیاد 2سال قبل رکھی گئی تھی، جس کا جتنا کریڈٹ بنتا ہے اسے دینا چاہیے۔
خدیجہ شاہ نامی ایک صارف نے فواد چوہدری کی اکتوبر 2020 کی ٹویٹ شیئر کرتے ہوئے کہا کہ ہمیں منصوبوں میں ایسے تسلسل چاہیے، اچھے اقدامات کو قائم رہنا اور آگے بڑھایا جانا چاہیے، فواد چوہدری نے پی ٹی وی فلکس کی بنیاد رکھی جسے آج مریم اورنگزیب نے لانچ کیا، اگر تمام وزارتوں میں ایسا ہونے لگ جائے تو ہم آج کے مقابلے میں بہتر حالت میں ہوں۔
منصوبے کی بنیاد رکھنے والے پی ٹی آئی کے رہنما اور سابق وزیر اطلاعات و نشریات فواد چوہدری نے خود اس معاملے پرر ردعمل دیتے ہوئے کہا کہ مریم اورنگزیب نے کچھ نہیں کیا سوائےایک سال ضائع کرنے کے، نجی پارٹنر شپ کے بغیر شروع کیا گیا یہ منصوبہ بہت جلد بند ہوجائے گا۔