بلوچستان کے علاقے نوشکی میں حملے کے دوران جدید ترین اسلحے کے استعمال کا انکشاف ہوا ہے۔
خبررساں ادارے کی رپورٹ کے مطابق یہ انکشاف کمانڈنٹ ایف سی کی جانب سے وزیراعلی بلوچستان عبدالقدوس بزنجو اورچیئرمین سینٹ صادق سنجرانی سمیت اراکین اسمبلی کو دی گئی بریفنگ کے دوران کیا گیا۔
رپورٹ کے مطابق وزیراعلی بلوچستان عبدالقدوس بزنجو اور بلوچستان سے تعلق رکھنے والے چیئرمین سینیٹ صادق سنجرانی نے نوشکی میں حالیہ حملوں کے بعد ایف سی ہیڈکوارٹر کا دورہ کیا اور ایف سی اہلکاروں سے ملاقات کی ہے۔
اس موقع پر ایف سی کمانڈنٹ کی جانب سے وفد کو دی گئی بریفنگ میں بتایا گیا کہ نوشکی میں حملہ کرنے والے دہشت گرد جدید ترین اسلحے سے لیس تھے اور وہ افغانستان میں براہ راست اپنے ہینڈلرز سے رابطے میں بھی تھے۔
ایف سی کمانڈنٹ کے مطابق اللہ کے فضل و کرم اور عوام کی دعاؤں سےہم نے دہشت گردوں کو انجام تک پہنچایا اور 9 دہشت گردوں کو مار کر حملے کوناکام بنایا، تاہم اس ساری کارروائی میں ہمارے4 سیکیورٹی اہلکار شہید ہوئے۔
وزیراعلی بلوچستان اور چیئرمین سینیٹ نے یادگار شہداء پر حاضری دی اور شہداء کی قبروں پر فاتحہ خوانی کی، وفد نے دہشت گردوں کے حملے کو سبوتاژ کرنے پر ایف سی کو مبارکباد دی اور وطن کے تحفظ کیلئے دہشت گردوں کا دلیری سے مقابلہ کرنےوالے اور شہادت پانے والے ایف سی اہلکاروں کو خراج تحسین پیش کیا۔
وفد کا کہنا تھا کہ ہماری بہادر سیکیورٹی فورسز کے ہوتے ہوئے دشمن ہمیں کوئی نقصان نہیں پہنچا سکتے، ہم اپنی سیکیورٹی فورسز کے ساتھ کھڑے ہیں۔
