راولپنڈی کی مقامی عدالت نے چیف جسٹس آف پاکستان کے خلاف دھمکی آمیز سوشل میڈیا مہم چلانے والے ملزم کو جوڈیشل ریمانڈ پر جیل منتقل کردیا ہے۔
تفصیلات کے مطابق راولپنڈی کی عدالت میں جوڈیشل مجسٹریٹ عادل سرور سیال نے چیف جسٹس کے خلاف دھمکی آمیز سوشل میڈیا مہم چلانےکے خلاف کیس کی سماعت کی، اس موقع پر ملزم عبدالواسع کو 2 روزہ جسمانی ریمانڈ مکمل ہونے پر عدالت کے سامنے پیش کیا گیا۔
عدالت نے ملزم کا جسمانی ریمانڈ مکمل ہونے پر اسے جوڈیشل ریمانڈ پر جیل بھیجنے کے احکامات جاری کردیئے۔
خیال رہے کہ چیف جسٹس آف پاکستان قاضی فائز عیسیٰ کے خلاف دھمکی آمیز سوشل میڈیا مہم چلانے والے ملزم عبدالواسع کا 22 فروری کو 2 روزہ جسمانی ریمانڈ منظور کیا گیا تھا جس کے بعد مقامی عدالت نے انہیں ایف آئی اے سائبر کرائم ونگ کے حوالے کردیا گیا تھا۔
یادرہے کہ ملزم نے سوشل میڈیا پر چیف جسٹس کی کردار کشی کی اور دھمکی آمیز مہم چلائی جس کے بعد قانون نافذ کرنے والے اداروں نے فوری طور پر حرکت میں آتے ہوئے ملزم کو حراست میں لے لیا اور مہم کو چلانے والے دیگر کرداروں کی تلاش کا عمل بھی شروع کردیا۔