انگلینڈ کرکٹ بورڈ کی طرف سے آئی سی سی چمپئنز ٹرافی کے لیے بھارت کے پاکستان نہ جانے کی صورت میں متبادل آپشنز پر غور کیا جا رہا ہے۔ چیئرمین انگلینڈ کرکٹ بورڈ (ای سی بی) رچرڈ تھامپسن اور سی ای او رچرڈ گولڈ نے ملتان میں برطانوی صحافیوں سے گفتگو کرتے ہوئے کہا کہ بھارت کے بغیر آئی سی سی چمپئنز ٹرافی آپشن نہیں ہے، کرکٹ کے براڈکاسٹنگ رائٹس کو بچانا چاہیے، بھارت کے پاکستان نہ جانے کی صورت میں متبادل آپشن پر غور کر رہے ہیں۔
انہوں نے کہا کہ پاکستان میں آئی سی سی چمپئنز ٹرافی کے انعقاد پر بھارت کے وہاں نہ جانے کی صورت میں ہائبرڈ ماڈل کے امکانات بڑھ رہے ہیں تاہم بھارتی کرکٹ ٹیم کے پاکستان میں جانے یا نہ جانے کا حتمی فیصلہ بھارتی حکومت نے کرنا ہے۔ رچرڈ تھامپسن نے کہا کہ آئی سی سی چمپئنز ٹرافی میں بھارتی کرکٹ ٹیم کا شریک نہ ہونا کرکٹ کے مفاد میں نہیں ہو گا۔
انہوں نے کہا کہ سابق سیکرٹری بھارتی کرکٹ بورڈ جے شاہ جو اب آئی سی سی کے سربراہ بھی ہوں گے ان کا اس معاملے میں کردار انتہائی اہم ہے، چند دنوں میں آئی سی سی کے اجلاس ہیں جن میں مختلف آپشنز زیرغور آئیں گے۔ پاکستان اور بھارت جب کھیلتے ہیں تو اس خطے میں سکیورٹی کے خدشات پیدا ہوتے ہیں۔
انہوں نے کہا کہ پاکستان اور بھارت کے درمیان میچ نہ ہونے سے براڈکاسٹنگ رائٹس پر منفی اثر پڑے گا اور ہمیں اس کا ہمیں تحفظ کرنا ہے، اگر ایسے حالات آئے تو بہت سے آپشنز دستیاب ہوں گے۔ پاکستان کیلئے یہ بہت بڑا لمحہ ہے اور امید ہے پاکستان میں پورا ایونٹ دیکھا جا سکے گا، یہ معاملہ پاکستان اور بھارت کے درمیان ہے اور امید کرتے ہیں کہ وہ کوئی درمیانی راستہ نکال لیں گے۔
دوسری طرف پاکستان کرکٹ بورڈ کا چمپئنز ٹرافی مکمل طور پر پاکستان میں انعقاد کے موقف پر قائم ہے جس کے لیے سٹیڈیمز کی تزئین وآرائش کا عمل تیزی سے مکمل کیا جا رہا ہے۔ چمپئنز ٹرافی تمام کرکٹ ٹیموں اور ان کے فینز کیلئے ایک ورلڈکلاس یادگار ایونٹ ثابت ہو گا، واضح رہے کہ 2021ء میں آئی سی سی بورڈ نے پاکستان کو چمپئنز ٹرافی کی میزبانی دی تھی جس میں بھارتی کرکٹ ٹیم بھی شامل ہے۔
- Featured Thumbs
- https://www.siasat.pk/data/files/s3/15rixchharrtamsmkskhs.png
