ایڈووکیٹ جنرل پنجاب احمد اویس نے دوست محمد مزاری کے دعویٰ کو غلط قرار دیتے ہوئے کہا کہ میں نے سپریم کورٹ میں آج الیکشن ہونے کا کوئی بیان نہیں دیا۔
نجی چینل اے آروائی کے مطابق ڈپٹی اسپیکر پنجاب اسمبلی کے دعویٰ سے متعلق ایڈووکیٹ جنرل پنجاب کا موقف سامنے آیا ہے جس میں ان کا کہنا ہے کہ میں نے سپریم کورٹ میں آج الیکشن ہونے کا کوئی بیان نہیں دیا۔
ایڈووکیٹ جنرل پنجاب احمد اویس نے کہا کہ عدالت عظمیٰ کوبتایا تھا کہ امن وامان کی صورتحال پر اسپیکر نے پنجاب اسمبلی کا اجلاس ملتوی کیا۔
انہوں نے دوست محمد مزاری کے ایڈووکیٹ جنرل پنجاب کے ساتھ مشاورت کے دعوے کو غلط قرار دیا، احمد اویس نے کہا کہ انہوں نے سپریم کورٹ میں صرف اتنا کہا تھا کہ اسپیکر جو ہوگا آئین کے مطابق فیصلہ کرے گا۔
ان کا یہ بھی کہنا تھا کہ آج کے اجلاس کی کوئی قانونی حیثیت نہیں تھی اور نہ ہی مجھ سے کوئی مشاورت کی گئی تھی۔
واضح رہے کہ اس سے قبل اسی چینل کے پروگرام "آف دی ریکارڈ" میں گفتگو کرتے ہوئے ڈپٹی اسپیکر پنجاب اسمبلی دوست محمد مزاری کا کہنا تھا کہ تین اپریل کو پنجاب اسمبلی میں نئے قائد ایوان کےانتخاب کیلئے ووٹنگ ہونا تھی تاہم کشیدہ صورت حال کے باعث اجلاس ملتوی کردیا گیا۔
دوست محمد مزاری نے یہ بھی کہا تھا کہ 6 اپریل کو دوبارہ سیشن ہونا تھا مگر ن لیگ نے سپریم کورٹ میں پٹیشن داخل کی، جہاں سپریم کورٹ میں اے جی پنجاب نے کمٹمنٹ کی تھی، کمٹنمنٹ کےمطابق 6 اپریل کوپنجاب اسمبلی کا اجلاس بلایا جانا تھا۔
