ڈپٹی کمشنر لاڑکانہ کو شدید بارشوں اور سیلاب سے متاثرہ افراد کے لیے دیئے ئے خیمے اور راشن سمگل کیے جانے کا انکشاف ہوا ہے۔
تفصیلات کے مطابق پاکستان تحریک انصاف سندھ کے صدر اور سابق وفاقی وزیر علی حیدر زیدی نے سماجی رابطوں کی ویب سائٹ پر ایک ویڈیو شیئر کرتے ہوئے انکشاف کیا ہے کہ ڈپٹی کمشنر لاڑکانہ کو شدید بارشوں اور سیلاب سے متاثرہ افراد کے لیے دیئے ئے خیمے اور راشن سمگل کیے جا رہے ہیں جس میں ٹریکٹر، ڈرائیور اور سٹور کیپر سمیت تمام انتظامیہ ملوث ہے۔
ویڈیو میں دیکھا جا سکتا ہے کہ ایک شخص انتظامیہ سے سوال کر رہا ہے کہ رات کے اس پہر عوام کیلئے دیا گیا یہ سامان ٹریکٹر میں ڈال کر کس کی اجازت سے، کہاں لے جایا جا رہا ہے؟
ویڈیو بنانے والے شخص کا کہنا تھا کہ یہاں سامان پڑا ہے جسے ٹریکٹر میں ڈال کر لے جایا جا رہا ہے اور کوئی جواب دینے کو تیار نہیں سرعام بدمعاشی کی جا رہی ہے جبکہ سوال کے جواب میں وہ شخص کہتا ہے کہ اعلیٰ افسران سے بات کریں، بدمعاشی نہ کریںاور جو کرنا ہے آپ کر لیں۔
وفاقی وزیر علی حیدر زیدی نے ایک اور ویڈیو شیئر کی جس میں دیکھا جا سکتا ہے کہ ویڈیو بنانے والا شخص خیمے اور راشن لے کر جانے والے ٹریکٹر ڈرائیور سے پوچھتا ہے کہ یہ سامان کہاں لے جایا جا رہا ہے جس کے جواب میں ٹریکٹر ڈرائیور کا کہنا تھا کہ مجھے اس بارے کوئی خبر نہیں۔ ویڈیو بنانے والے شخص کا کہنا تھا کہ یہ سامان عوام کیلئے ہے جسے رات کے وقت سمگل کیا جا رہا ہے جبکہ خیمے اور راشن لے کر جانے والے ٹریکٹر کی نمبرپلیٹ بھی موجود نہیں ہے جبکہ یہاں پر کوئی ذمہ دار فرد بھی موجود نہیں ہے۔
ایک اور ٹویٹ میں انہوں نے سندھ حکومت پر تنقید کرتے ہوئے لکھا کہ: بلاول زرداری کا غیر ملکی حکومتوں/یجنسیوں سے مدد کی اپیل کرنا شرم کا مقام ہے۔ سندھ کی حکومت اور PDMAخود کچھ کیوں نہیں کر رہی۔ اوپر سے وفاقی حکومت ملک میں سیلاب متاثرین پر توجہ دینے کے بجائے عمران خان کے خلاف جھوٹے مقدمات بنانے میں مصروف ہے۔ ان غلیظ لوگوں سے کچھ اور توقع نہیں!
دریں اثنا سابق وفاقی وزیر علی حیدر زیدی نے اپنے ٹویٹر پیغام میں پی ٹی آئی سندھ کے عہدیداران کو متاثرین سیلاب کی امداد کے حوالے سے ٹویٹ کرتے ہوئے لکھا کہ: سیلاب نے صوبہ سندھ میں تباہی مچا دی ہے۔ اس آفت نے ہم سب کو اپنی لپیٹ میں لے لیا ہے۔پی ٹی آئی سندھ کے تمام عہدیداران کو فوری طور پر ہدایت کی جاتی ہے کہ وہ اپنے اپنے علاقوں میں ریسکیو اور ریلیف آپریشنز میں بڑھ چڑھ کے حصہ لیں۔ہمیں اپنے ساتھی پاکستانیوں کی ہر ممکن مدد کرنی چاہیے۔
