آئی ایم ایف معاہدے میں تاخیر کی کوئی تکنیکی وجہ نہیں،اسحاق ڈار
وزیرخزانہ اسحاق ڈار کہتے ہیں ادائیگیوں میں کسی قسم کی تاخیر نہیں ہوئی کوشش ہے کہ غیرملکی ادائیگیاں وقت پر کریں،ڈیفالٹ کی تاریخیں دینےوالوں کو شرم آنی چاہئے، اسلام آباد میں میڈیا سے گفتگو میں اسحاق ڈار نے کہا کچھ لوگوں کوشوق ہے کہ ملک ڈیفالٹ کرجائے،پاکستان کے پاس ٹریلین ڈالرز کے اثاثے ہیں،ادائیگیاں وقت پرکریں گے ملک ڈیفالٹ نہیں ہوگا ۔۔ ملک کو مل کر مشکلات سے نکالیں گے۔
وفاقی وزیر خزانہ اسحاق ڈار نے مزید کہا بہت مشکل اصلاحات ہوچکی ہیں اور آئی ایم ایف معاہدے کی تاخیر میں کوئی تکنیکی وجہ نہیں،ملک میں سیاسی عدم استحکام سب سے نقصان دہ چیز ہے، حکومت اب تک معیشت میں جدوجہد کررہی ہے۔
انہوں نے کہا یہ بڑا مشکل فیصلہ تھا کہ گزشتہ حکومت کو چلنے دیں اور تباہی ہوجائے یا پھر فیصلہ لیا جائے، پھر سب جماعتوں نے مل کر فیصلہ کیاکہ سیاست ہوتی رہتی ہے، پی ڈی ایم کی تمام جماعتوں نے لبیک کہا تو ہم نے ذمہ داری لے لی، پہلے 1998، پھر 2013 اور آج پھر ملک کو ہماری ضرورت ہے۔
وزیر خزانہ نے کہا پاکستان نے سروائیو کرنا ہے اور ہم نے مل کر چیلنج کا سامنا کیا مزید بھی کریں گے، بہت مشکل اصلاحات ہوچکیں، آئی ایم ایف معاہدے کی تاخیر میں کوئی تکنیکی وجہ نہیں ہے،ہماری سب سے پہلی ترجیح ہے کہ پاکستان کی کسی کمٹمنٹ میں تاخیر نہ ہو، کوشش ہے غیر ملکی ادائیگیاں وقت پر ہوں اور کر بھی رہے ہیں۔
وزیر خزانہ کا کہنا تھا ہمیں گھبرانے کی ضرورت نہیں ہے، معاشی ٹیم پوری کوشش کررہی ہے، ہم اس مسئلے سے نکلیں، آئندہ ہفتوں میں نئے آئیڈیاز ہونگے اور بجٹ بھی ہوگا اس کے بعد لانگ ٹرم کے لیے کچھ اور کام ہونگے، پاکستان میں اب وہ چیزیں ہونگی جس کا یہ حقدار ہے۔
اسحاق ڈار نےمزید کہا ایک روز میں سارے مسائل حل نہیں ہوسکتے ، ملکی معیشت مشکل کا شکار ہے لیکن بہتری کی امید ہے، قرض زیادہ ہے لیکن ملک کے پاس قیمتی اثاثے ہیں اس میں اضافہ ہواہے، اس لیے ناامیدی کی کوئی ضرورت نہیں ہے۔
- Featured Thumbs
- https://www.siasat.pk/data/files/s3/ishaq-dar-imf-loan-a.jpg
