سینئر تجزیہ کار ڈاکٹر شاہد مسعود نے انکشاف کیا ہے کہ وزیراعظم شہبازشریف جو امداد ترکی کے زلزلہ متاثرین کیلئے لے کر گئے ہیں وہ وہی امداد ہے جو ترکی نے ہمیں سیلاب زدہ علاقوں کیلئےبھجوائی تھی۔
جی این این کے پروگرام"لائیوود ڈاکٹر شاہد مسعود" میں خصوصی گفتگو کرتے ہوئے سینئر تجزیہ کار کا کہنا تھا کہ وزیراعظم ترکی کے دورے کیلئے لاہور سے روانہ ہوئے، ترکی پہنچنے کے بعد ایک عجیب و غریب خبر بھی سامنے آئی ہے۔
انہوں نے کہا کہ ترکی سے خبرآئی ہے کہ جو امدادی سامان وزیراعظم اپنے ہمراہ لے کر گئے وہ غالبا سندھ سے بھیجا گیا، جب سامان وہاں پہنچا تو ان پیکٹس کے اوپر تو "حکومت سندھ "اور "حکومت پاکستان" درج تھا تاہم جیسے ہی ان پیکٹس کو کھولا گیا تو اندر سے جو پیکٹ نکلا اس پر درج تھا " ترکی کی جانب سے محبت کےساتھ"۔
شاہد مسعود نے کہا کہ یہاں کے لوگوں نے ترکی کی جانب سے سیلاب زدہ علاقوں کیلئے موصول ہونے والے سامان کو ہی دوبارہ پیک کرکے ترکی کے زلزلہ متاثرین کیلئے بھجوادیا۔
ڈاکٹر شاہد مسعود نے اس حرکت پر شدید افسوس کا اظہار کرتے ہوئے کہا میں نہیں جانتا کہ ترکی کا میڈیا اس خبر کو رپورٹ کرتا ہے یا ہماری عزت رکھنے کیلئے چھپا لیتا ہے، تاہم یہ ترکی میں قونصلیٹ جنرل کو اندر سے خبر دی ہے جو پاکستان کیلئے انتہائی شرمندگی کا مقام ہے۔