سینئر اداکار فردوس جمال نے کہا ہے کہ اگر 90 فیصد لوگ ہمایوں سعید اور ماہرہ خان کو پسند کرتے ہیں تو میں ان لوگوں کی طرح پاگل نہیں ہوں۔
تفصیلا ت کے مطابق فردوس جمال نے نجی ٹی وی چینل کے پروگرام میں خصوصی گفتگو کرتے ہوئے ایک بار پھر سپر اسٹار ہمایوں سعید اور مشہور اداکارہ ماہرہ خان کی اداکاری و شخصیت سے متعلق گفتگو کی۔
فردوس جمال نے ہمایوں سعید سے متعلق سوال کے جواب میں ان پر تنقید کی اور انہیں ڈاکو قرار دیتے ہوئے کہا کہ اگر ہمایوں سعید سب سے زیادہ معاوضہ لینے والے اداکار ہیں تو پیسے طوائف بھی لیتی ہے،ہمایوں سعید کو اس جگہ بھی کاسٹ کیا جاتا ہے جہاں ان کی ضرورت نہیں ہوتی۔
انہوں نے کہا کہ ہمایوں سعید نے چند اچھے کردار کیےجو خوش قسمتی سے لوگوں کو پسند آئے، مگر ان کے مشہور ہونے کی بڑی وجہ وسائل کو استعمال کرکے انہیں کیش کروانا ہے، ان کی قسمت اچھی تھی اور ان کے پاس وسائل بھی تھے، ساتھ ہی خدا ان پر مہربان ہوئے، مگر ہمایوں سعید اپنے سے اچھے اداکار کو آگے نہیں آنے دیتے۔
میزبان نے فردوس جمال کی جانب سے ماضی میں ماہرہ خان پر کی گئی تنقید کا حوالہ دیتے ہوئے پوچھا کہ ماہرہ نے لیجنڈ آف مولا جٹ میں بہترین اداکاری کا مظاہرہ کیا، کیا اب آپ کے خیالات میں کوئی تبدیلی آئی ہے؟
فردوس جمال نے جواب دیا کہ میں آج بھی اپنی بات پر قائم ہوں، میں نے ماہرہ خان سے متعلق جو کہا وہ حقیقت تھی، ماہرہ خان کی عمر اتنی ہی ہے، اگر کسی کو ماہرہ میں خوبصورتی نظر آتی ہے تو اس میں میری کوئی غلطی نہیں ہے، وہ کسی کو بھی خوبصورت لگ سکتی ہیں۔
سینئر اداکار نے کہا کہ میں کسی کی بھی اداکاری کا موازنہ ایلز بتھ ٹیلر جیسی اداکارؤں کی اداکاری سے کرتا ہوں، اگر ملک میں 90 فیصد لوگ ماہرہ خان کو پسند کرتے ہیں ، 90 فیصد لوگ اگر پاگل ہیں تو میری کوئی غلطی نہیں ہے، میرا خوبصورتی اور اداکاری سے متعلق اپنا زاویہ ہے اور میں اسی حساب سے چیزوں کو دیکھتا ہوں۔
- Featured Thumbs
- https://www.siasat.pk/data/files/s3/fardsou111h123.jpg
