پاکستان پیپلز پارٹی کے چیئرمین بلاول بھٹو زرداری نے بھارتی حکومت کو سخت الفاظ میں خبردار کرتے ہوئے کہا ہے کہ دریائے سندھ پاکستان کا ہے، اس میں یا تو پاکستان کا پانی بہے گا یا بھارت کا خون۔ سکھر میں ایک بڑے جلسہ عام سے خطاب کرتے ہوئے بلاول نے کہا کہ مودی حکومت کی آبی جارحیت کا بھرپور جواب دیا جائے گا اور سندھ طاس معاہدے کی کسی بھی ممکنہ خلاف ورزی کو ہرگز برداشت نہیں کیا جائے گا۔
بلاول بھٹو زرداری نے کہا کہ ہم ڈٹ کر بھارت کا مقابلہ کریں گے اور پاک فوج بھارت کو منہ توڑ جواب دینے کی صلاحیت رکھتی ہے۔ انہوں نے کہا کہ اگر مقبوضہ کشمیر میں دہشت گردی کا واقعہ ہوتا ہے تو بھارت فوراً پاکستان پر الزام لگا دیتا ہے، جو کہ ناقابل قبول ہے۔
چیئرمین پیپلز پارٹی نے بھارت کی دریائے سندھ سے متعلق حالیہ کوششوں کو ناکام بنانے کا عزم ظاہر کرتے ہوئے کہا کہ سندھ کے دریا کے ہم وارث ہیں اور ہم ہی اس کا دفاع کریں گے۔ انہوں نے کہا کہ سندھ طاس معاہدے کی معطلی کسی صورت قبول نہیں کی جائے گی۔
کینالز (نہری نظام) کے منصوبوں پر بات کرتے ہوئے بلاول بھٹو نے کہا کہ پیپلز پارٹی اور مسلم لیگ (ن) نے اتفاق کیا ہے کہ نئی کینالز عوام کی مرضی اور تمام صوبوں کی رضامندی کے بغیر نہیں بنیں گی۔ انہوں نے کہا کہ جولائی سے ان منصوبوں پر پیپلز پارٹی کو اعتراض ہے اور ایسے تمام منصوبے جو اتفاق رائے سے محروم ہوں، انہیں متعلقہ اداروں کو واپس بھیجا جائے گا۔
