خبریں

پاکستانیوں کے لئے بڑی خوشخبری، برطانیہ نے پاکستان پر عائد سفری پابندی ختم کرکے نام ریڈلسٹ سے نکال دیا۔ تفصیلات کے مطابق برطانیہ نے جمعے کو اپنی ٹریول لسٹ اپ ڈیٹ کی ہے جس کے بعد پاکستان اور ترکی سمیت آٹھ ممالک کو سفری پابندیوں سے متعلق ریڈلسٹ سے نکال دیا ہے۔ پاکستان میں برطانوی ہائی کمشنر کرسٹن ٹرنر نے اپنی ایک ٹویٹ میں لکھا ہے کہ مجھے تصدیق کرتے ہوئے خوشی محسوس ہو رہی ہے کہ پاکستان کو ریڈ لسٹ سے نکال دیا گیا ہے۔ مجھے علم ہے کہ پچھلے پانچ ماہ کتنے مشکل تھے بہت سارے لوگوں کے لیے جو پاکستان اور برطانیہ کے درمیان قربت پر انحصار کرتے ہیں۔ انہوں نے اپنی ٹویٹ میں وفاقی وزیر برائے منصوبہ بندی اسد عمر اور وزیراعظم کے معاون خصوصی برائے صحت ڈاکٹر فیصل سلطان کا شکریہ بھی ادا کیا اور کہا کہ یہ آپسی کوششوں کا نتیجہ ہے۔ ایک اور ٹویٹ میں انہوں نے لکھا کہ پاکستان برطانیہ کے ساتھ مل کر کام کرتا رہے گا تاکہ دونوں ممالک میں ڈیٹا شیئرنگ اور عوامی صحت کی حفاظت کو یقینی بنایا جا سکے۔ برطانوی ٹرانسپورٹ سیکرٹری گرانٹ شاپس کے مطابق برطانیہ نے پاکستان، ترکی اور مالدیپ سمیت 8 ممالک کو سفری پابندیوں کی ریڈ لسٹ سے نکال دیا ہے، پاکستان کو ریڈ لسٹ سے نکالنے کے فیصلے کا اطلاق 22 ستمبر سے ہوگا۔ واضح رہے کہ برطانیہ نے پاکستان کو رواں سال9 اپریل سے سفری پابندیوں کی ریڈ لسٹ میں شامل کر رکھا تھا جبکہ گذشتہ ماہ انڈیا کو اس فہرست سے نکال دیا گیا تھا تاہم پاکستان کو اسی فہرست میں برقرار رکھا تھا۔

برطانیہ کی وزیر ثقافت ناڈین ڈوریس نے مطالبہ ہے کہ ملک میں خواتین کے نقاب کرنے پر مکمل طور پر پابندی عائد کی جائے۔ خبررساں ادارے کی رپور ٹ کے مطابق ماضی میں مسلم خواتین کے نقاب پہننے پر تنقید کرنے والی ناڈین ڈوریس نے وزیر ثقافت بننے کے بعد بھی ایک بار پھر اپنے مطالبات کو دہراتے ہوئے کہا ہے کہ خواتین کے نقاب پہننے پر پابندی عائد کی جانی چاہیے، کیونکہ یہ گھریلو تشدد کے زخموں کے نشانات چھپانے کیلئے استعمال کیا جاتا ہے۔ انہوں نے مزید کہا کہ مسلم خواتین کو اپنے لیے لباس کا انتخاب کرنے کی اجازت نہیں ہوتی، ان معاشروں میں تو خواتین کو اپنا ازدواجی ہم سفر منتخب کرنے کا اختیار بھی نہیں ہوتا۔ ٹویٹر پر ایک مسلم خاتون کو جواب دیتے ہوئے وزیر ثقافت نے کہا کہ نقاب قرون وسطی کا لباس ہے جس کی کوئی جگہ آج کے لبرل معاشرے میں نہیں ہے، کسی بھی ترقی پسند ملک میں اسے بالکل برداشت نہیں کیا جاسکتا۔ واضح رہے کہ 64 سالہ ناڈین ڈوریس کو حال ہی میں برطانوی وزیراعظم بورس جانسن کی جانب سے وزارت ثقافت کا قلمدان سونپا گیا تھا، ناڈین ڈوریس نے 2018 میں بورس جانسن کے متنازعہ کالم جس میں انہوں نے نقاب پوش خواتین کو بینک ڈاکواور لیٹر بکس سے مشابہت دی تھی، اس وقت بھی نقاب پر مکمل پابندی عائد کرنے کا مطالبہ کیا تھا۔

اسلام پر ایمان لانے کیلئے عمر کی کوئی قید ‏نہیں، تحریک انصاف کے رکن قومی اسمبلی و وزیرمملکت علی محمد خان نے قبول اسلام کے لیے عمر کی حد مقرر کرنے سے ‏متعلق افواہوں کی تردید کر دی۔ تفصیلات کے مطابق وزیرمملکت علی محمد خان نے کہا کہ اسلام کی قبولیت کےلئےعمرحدکی کوئی ترمیم نہیں لا رہے ہیں۔ علی محمد خان نے مزید کہا کہ پاکستان میں تمام اقلیتوں کومذہبی آزادی حاصل ہے، چند ‏افراد کا پروپیگنڈا ہےجس میں کوئی حقیقت نہیں ہے۔ وزیرمملکت نے اپنے ٹوئٹر اکاؤنٹ پر بیان جاری کرتے ہوئے کہا کہ اسلام میں ایمان لانے کیلئے عمر کی کوئی قید ‏نہیں البتہ کسی کو جبری مسلمان نہیں کیا جاسکتا، اسلام لانے کیلئے 18سال کے عمر کی شرط کا اسلام سے ‏کوئی تعلق نہیں اور نہ ہی حکومت اس کی حامی ہے جس کی طرف سے بھی ایسی تجویز آئی ہے اس کو رد کیا ‏جاتا ہے۔ انہوں نے اپنی ایک اور ٹویٹ میں لکھا کہ مذہب کی جبری تبدیلی کے بل کے حوالہ سے خدشات کااظہار کیا جا رہا ہے ‏حکومت مجوزہ بل میں کسی بھی غیر اسلامی قانونی شق کو پاس نہیں ہونے دے گی۔ تجویز کردہ بل تفصیلی ‏جائزےکیلئےکمیٹی سے وزارت مذہبی اُمور کو باضابطہ بھیجا گیاہے اسلامی قوانین کی لوازمات پوری ہوں گی توبل ‏پاس ہو گا ورنہ نہیں۔

دوشنبے: وزیراعظم عمران خان کی قصر ملت آمد پر تاجک صدر امام علی رحیم نے پرتپاک استقبال کیا، وزیر اعظم عمران خان کو گارڈ آف آنر پیش کیا گیا۔ استقبالیے میں دونوں ملکوں کے ترانے بھی بجائے گئے۔ تاجک صدر کے ساتھ ملاقات میں دو طرفہ امور پر تبادلہ خیال کیا گیا اس سے پہلے عمران خان نے ایس سی او میٹنگ سے خطاب کرتے ہوئے کہا کہ پاکستان نے کورونا کے دوران سمارٹ لاک ڈاؤن کی پالیسی کو اپنایا اور عوام کا تحفظ کیا۔ انہوں نے مزید کہا کہ پاکستان نے موسمیاتی تبدیلی کے پیش نظر خاطرخواہ اقدامات اٹھائے ہیں۔ دہشت گردی کے حوالے سے بات کرتے ہوئے وزیراعظم نے کہا کہ پاکستان دنیا میں سب سے زیادہ اس سے متاثرہ ملک ہے۔

سابق وزیراعظم نواز شریف ملک میں بڑھتی مہنگائی پر برہم ملک کے عوام کو مہنگائی نے کردیا پریشان،موجودہ حکومت عوام پر ایک کے بعد ایک مہنگائی کے بم گرا رہی ہے، جس پر عوام تو حکومت کو خوب کوس رہے ہیں، ساتھ ساتھ اپوزیشن بھی موقع سے فائدہ اٹھاتے ہوئے لگے ہاتھوں تنقید کررہی ہے۔ سابق وزیراعظم نواز شریف نے حکومت کو مہنگائی پر خوب آڑے ہاتھوں لیا، نواز شریف نے کہا کہ جب تک ادارے ٹھیک نہیں ہونگے پاکستان سے مہنگائی اور بیروز گاری کا خاتمہ نہیں ہوگا، لاقانونیت بھی اسی طرح برقرار رہے گی، عمران خان پر تنقید کرتے ہوئے نواز شریف نے کہا کہ جو شخص اپنی بات پر قائم نہیں رہتا، یوٹرن لینے پر فخر محسوس کرتا ہے اس کے دور حکومت کو کوئی بہتر دور نہیں کیسے کہہ سکتا ہے۔ بہاولپور ڈویژن کےتنظیمی اجلاس سے خطاب میں نواز شریف نے اشیائے خورونوش کی قیمتوں پر بات تبصرہ کیا، انہوں نے کہا کہ چینی میں ہاتھ ڈالا تو اس کی قیمت پچاس روپے سے بڑھ کر سو روپے ہوگئی،بجلی 9روپے یونٹ سے 22روپے یونٹ ہو گئی،گھی 150روپے سے 350 روپے کلو کردیا گیا،ڈالر میں ہاتھ ڈالا تو 100 روپے سے 170روپے تک لے گیا۔ نواز شریف نے مزید کہا کہ مسلم لیگ ن اس وقت پاکستان کی سب سے بڑی جماعت ہے، اس کی تنظیم سازی مکمل ہونا بہت ضروری ہے،کنٹونمنٹ بورڈ کے الیکشن میں ہمیں ﷲ تعالیٰ نے فتح سے نوازا ہے،آنے والا وقت ہمارا ہے اس کیلیے محنت اور پارٹی کو مضبوط کرنا ہوگا،میں تکبر یا غرور کی بات نہیں کررہا ہے،بات عزم کی ہے۔اگر ملک کے نوجوان اپنا نظریہ بنالیں تو پاکستان بدل جائے گا،جس مقصد کےلئے پاکستان بنایا گیا تھا وہ پورا ہو جائے گا۔ گزشتہ روز ملک میں پیٹرول کی قیمت میں ایک نہیں دو نہیں پورے پانچ روپے اضافہ کیا گیا، جسے عوام نے مسترد کردیا ہے، عوام ملک میں بڑھتی مہنگائی سے تنگ آچکے ہیں۔

لاہور میں غریب مزدرو کیلئے تنخواہ مانگنا جرم ہوگیا، ملازم کو جان سے ہاتھ دھونا پڑا،نشتر کالونی میں ملازم اسحاق کارخانے کے مالک یاسین سے تنخواہ مانگنے گیا تو مالک نے ظلم کی انتہا کردی، ملازم کو اس کا حق دینے کے بجائے غریب مزدور پر تیزاب پھینک دیا،جس سے پچپن سالہ مزدور جھلس گیا،مزدور کو اسپتال منتقل کیا گیا جہاں اس نے تڑہپ تڑپ کر جان دے دی۔ پچپن سالہ اسحاق نشتر کالونی کےکارخانے میں ملازم تھا،اس واقعے کا مقدمہ درج کرلیا گیا ہے، جبکہ ملزمان کی گرفتاری کیلئے پولسی چھاپے مار رہی ہے، بستی خیر دین نور شاہ روڈ کے اسحاق نے کارخانے کے مالک یاسین سے تنخواہ مانگی تو یاسین نے صبح تک انتظارکرنے کا کہا تھا۔ غریب اسحاق نے صبر کرکے صبح تک انتظار کیا لیکن نہیں جانتا تھا کہ صبح اسکی موت کا سامان کیا جا رہا ہے، اسحاق تنخواہ کے حصول کیلئے کارخانے میں ہی سو گیا اور سوتے ہوئے ملازم پر مالک یاسین نے دیگر ساتھیوں کے ساتھ مل کر تیزاب پھینک دیا، تیزاب سے اسحاق کا چہرہ اور جسم بری طرح جھلس گیا تھا۔

مشہور گلوکار و فلم ساز سلمان احمد نے انکشاف کیا ہے کہ انہوں نے وزیراعظم عمران خان کی زندگی پر ایک دستاویز فلم تیار کی ہے جس کا نام "اسپرچوئل ڈیموکریسی" رکھا گیا ہے۔ میڈیا رپورٹ کے مطابق مشہور میوزیکل بینڈ جنون سے شہرت پانے والے سلمان احمد نجی ٹی وی چینل کے مارننگ شو میں شریک ہوئے، دوران گفتگو انہوں نے بتایا کہ وزیراعظم عمران خان کی 50 سالہ زندگی پر دستاویزی فلم تیار کی ہے۔ انہوں نے کہا کہ فلم میں عمران خان کی زندگی کی حقیقی ویڈیوز اور تصاویر شامل کی گئی ہیں، فلم کے چار حصے ہیں، پہلے حصےمیں عمران خان کے وزیراعظم بننے سے قبل کی سوچ اور اوور آل زندگی پر روشنی ڈالی گئی ہے۔ سلمان احمد کے مطابق فلم کا دوسرا حصہ عمران خان کے بھارت کے حوالے سے نظریات اور سیاسی سوچ پر مبنی ہے جبکہ تیسرے حصے میں کورونا کے عالمی بحران کے دوران صورتحال سے نمٹنے کیلئے عمران خان کے اقدامات کو اجاگر کیا گیا ہے۔ گلوکار نے بتایا کہ فلم کے آخری اور چوتھے حصے میں وزیراعظم عمران خان کے وژن اور مستقبل کے منصوبوں کے حوالے سے تفصیلات پیش کی گئی ہیں۔ سلمان احمد نے مزید کہا کہ میں وزیراعظم عمران خان کو پچھلے 35 سال سے جانتا ہوں اور میرے پاس ان کی لاتعداد تصاویر اور ویڈیوز موجود ہیں، فلم میں شامل کیا گیا دیگر مواد میں نے دوسرے ذرائع سے حاصل کیا ہے۔ گلوکار نے کہا کہ فلم انگریزی زبان میں ہوگی جسے فلمساز شعیب منصور اور میں نے خود شوٹ کیا ہے، تاہم فلم کی ریلیز کے حوالے سے ابھی تک حتمی فیصلہ نہیں کیا گیا ہے اور یہ کہنا بھی قبل از وقت ہوگا کہ فلم کس پلیٹ فارم پر نشر کی جائے گی۔

متحدہ عرب امارات حکومت نے پاکستان میں کیے جانے والے کورونا ریپڈ پی سی آر ٹیسٹ کے معیار کے حوالے سے پاکستانی حکومت کو خط لکھ کر اپنے تحفظات کا اظہار کیا ہے۔ خبررساں ادارے کی رپورٹ کے مطابق متحدہ عرب امارات کی جانب سے نیشنل کمانڈ اینڈ آپریشن سینٹر کو خط لکھا گیا جس میں پاکستانی ایئرپورٹس پر کیے جانے والے ریپڈ پی سی آر ٹیسٹس کے معیار پر تشویش کا اظہار کیا ہے۔ یواے ای نے خط میں کہا ہے کہ رواں برس اگست کے مہینے میں تقریبا 75ہزار سے زائد مسافروں نے یو اے ای کا سفر کیا، ان میں سے 684 مسافروں نے یو اے ای پہنچنے پر کیے گئے کورونا ٹیسٹ مثبت نکلے ہیں، حالانکہ ان تمام لوگوں کے پاس پاکستان میں کیے گئے ریپڈ پی سی آر ٹیسٹس کی رپورٹس موجود تھیں جو منفی تھیں۔ این سی او سی کو موصول ہونے والے خط میں یو اے ای نے غیر معیاری کورونا ٹیسٹ کرنے والی لیبارٹریز کے خلاف نوٹس لینے اور سخت ایکشن کا مطالبہ کیا گیا ہے اور کہا گیا ہے کہ پاکستانی غیر معیاری پی سی آر ٹیسٹ سے بیرون ملک پاکستان کی ساکھ متاثر ہورہی ہے، لہذا پاکستان کی مجاز اتھارٹی ایئرپورٹس پر لیبارٹریز کی جانب سے کیے جانے والے ٹیسٹس کی مانیٹرنگ کو یقینی بنائے۔

ڈی پی او چکوال کے حکم پر رات کو بھی تھانے میں ڈیوٹی کرتی خاتون پولیس اہلکار کو دیکھ کر آئی جی پنجاب حیران رہ گئے، انکوائری کا حکم دیدیا۔ خبررساں ادارے کی رپورٹ کے مطابق انسپکٹر جنرل پولیس پنجاب رات کے وقت اسلام آبا د سے واپس لاہور آرہے تھے کہ راستے میں انہوں نے اچانک کلر کہار پولیس اسٹیشن کا دورہ کیااور تھانے میں رات کے اس وقت میں ایک خاتون پولیس اہلکار کو ڈیوٹی کرتا دیکھ کر حیران رہ گئے۔ رپورٹ کے مطابق آئی جی پنجاب نے خاتون کو دیکھ کر پوچھا آپ اس وقت یہاں کیا کررہی ہیں؟ کیا آپ کوئی سائلہ ہیں؟ جس پر جواب دیتے ہوئے خاتون پولیس اہلکار نے بتایا کہ اسے ڈی پی او چکوال کی جانب سے بطورسزا 24 گھنٹے ڈیوٹی کرنے کا حکم دیا گیا ہے۔ خاتون پولیس اہلکار نے بتایا کہ ڈی پی او چکوال کے بچوں کو سنبھالنے سے انکار کیا تھا جس پر ناراض ہوکر ڈی پی او نے پولیس لائن سے ٹرانسفر کرکے خاتون اہلکار کی ڈیوٹی تھانے میں لگادی۔ آئی جی پنجاب نے خاتون اہلکار کا موقف جاننے کے بعد واقعے پر ایک انکوائری کمیٹی تشکیل دیتے ہوئے اہلکار کو دوبارہ پولیس لائن منتقل ہونے کے احکامات جاری کردیئے ہیں۔

حکومت نے کالعدم تحریک طالبان کو معافی کی مشروط پیشکش کردی، کالعدم تحریک اگر پاکستان کے آئین کو تسلیم کرلے اور دہشتگردی میں ملوث نہ ہوں تو معافی دی جاسکتی ہے۔ تفصیلات کے مطابق وزیر خارجہ شاہ محمود قریشی نے برطانوی نیوز چینل کو انٹرویو دیتے ہوئے کہا کہ حکومت کالعدم ٹی ٹی پی کے ان افراد کو معاف کرنے پر غور کر سکتی ہے جو پاکستانی آئین کو تسلیم کریں اور وہ جرائم میں ملوث نہ ہوں۔ وزیر خارجہ شاہ محمود قریشی نے کہا کہ افغانستان سے ملحق پاکستانی سرحد پر کوئی دباؤ نہیں ہے بلکہ وہاں امن و استحکام آگیا ہے۔انہوں نے حکومت کی جانب سے افغان عوام کے لئے انخلا کی سہولت کی فراہمی کی یقین دہانی کرواتے ہوئے کہا کہ ان افراد کے افغانستان سے انخلا میں سہولت فراہم کی جائے گی جن کے پاس مصدقہ دستاویزات ہیں۔ وزیر خارجہ نے مزید کہا کہ پاکستان کئی دہائیوں سے 30 لاکھ سے زائد افغان مہاجرین کی میزبانی کر رہا ہے لیکن اب ملک مجبور ہے اس لئے آنے والے مہاجرین کے لیے کوئی کیمپ نہیں بنایا جارہا۔انہوں نے افغان طالبان کی جانب سے کرائی گئی زبانی یقینی دہانی کا بھی تذکرہ کرتے ہوئے کہا کہ افغان طالبان کا موقف ہے کہ افغانستان سے پاکستان کے اندر کسی گروپ کو دہشت گردی کی اجازت نہیں ہوگی پاکستان بھی اس حوالے سے نظر رکھے ہوئے ہے۔ انہوں نے کہا کہ نئی طالبان قیادت کا رویہ 1990ء کی دہائی کے مقابلے میں مختلف ہے کیونکہ کابل میں بڑے پیمانے پر احتجاج کو برداشت کیا گیا۔ اشرف غنی کو ٹی ٹی پی کے حوالے سے پاکستان نے مسلسل نشاندہی کی لیکن انہوں نے کوئی اقدام نہیں کیا اب دیکھنا ہے کہ افغان طالبان اپنی یقین دہانیوں پر کام کرتے ہیں یا نہیں۔ پاکستان کی سرزمین میں افغانستان سے آنے والے افراد کے لیے کوئی مہاجر کیمپ یا دوبارہ آباد کرنے کی کوئی سہولت نہیں دی جا رہی ہے۔

اسلام آباد ہائی کورٹ میں نور مقدم قتل کیس کے مرکزی ملزم ظاہر جعفر کے والدین کی درخواست ضمانت بعد از گرفتاری پر سماعت ہوئی، اس موقع پر ظاہر جعفر کے والدین کے وکیل خواجہ حارث نے دلائل دیئے۔ وکیل خواجہ حارث نے دوران سماعت چالان رپورٹ پڑھی اور کہا کہ پولیس ظاہر جعفر کے بیان پر انحصار کر رہی ہے، ریمانڈ میں لینے کے بعد میرے موکل سے کوئی بیان نہیں لیا گیا، معلوم نہیں پولیس نے اپنی مسل پر کیا لکھا ہے۔ خواجہ حارث نے دلائل دیتے ہوئے کہا کہ اگر پولیس کو پہلے بتا دیا جاتا تو نور کی جان بچ سکتی تھی،چالان کے مطابق 19 جولائی اور 20 جولائی کو ملزم کا والد سے رابطہ ہوا، تھراپی ورکس کو سات بج کر پانچ منٹ پر ذاکر جعفر نے کال کی، مان لیتے ہیں کہ ملزم نے کالز کی ہیں لیکن یہ نہیں کہا جا سکتا کہ بات کیا ہوئی۔ اس موقع پر عدالت نے خواجہ حارث سے استفسار کیا کہ تھراپی ورکس والے ملزمان نامزد ہیں یا گواہ ہیں۔ خواجہ حارث نے جواب دیتے ہوئے کہا کہ تھراپی ورکس والے بھی کیس میں ملزم نامزد ہیں۔ عدالت نے ریماکس دیتے ہوئے کہا کہ اگر 7:05 پر تھراپی ورکس کو کال کی گئی تو واقعہ ساڑھے چھ سے سات کے دوران ہو سکتا ہے۔ خواجہ حارث نے دلائل دیتے ہوئے کہا کہ ظاہر جعفر کے والد ذاکر جعفر نے پولیس کو کال کر کے کہا کہ ظاہر جعفر کی حالت ٹھیک نہیں اسے لے جائیں، پہلے تو یہ معلوم ہی نہیں کہ ظاہر جعفر نے والدین کو قتل کا بتایا تھا،اگر یہ معلوم بھی ہو اور تھراپی ورکس والے ثبوت مٹانے گئے ہوں پھر بھی یہ کیس نہیں بنتا۔ خواجہ حارث نے کہا کہ پولیس تفتیش میں گرے ایریاز موجود ہیں ،ذاکر جعفر اور عصمت آدم جی پر اس الزام میں بھی قابل ضمانت دفعات لگتی ہیں،پولیس نے ذاکر جعفر اور عصمت آدم جی کا صرف دو روزہ جسمانی ریمانڈ لیا، اگر انکے خلاف اتنا مواد موجود ہوتا تو اسکا زیادہ ریمانڈ لیا جاتا۔ عدالت نے سماعت کل تک کیلئے ملتوی کرتے ہوئے خواجہ حارث کا اگلی سماعت پر دلائل مکمل کرنے کی ہدایت کردی ہے۔

نادرا (نیشنل ڈیٹا بیس اینڈ رجسٹریشن اتھارٹی) نے آئی ووٹنگ کے لیے الیکشن کمیشن کے ساتھ 2.4 ارب روپے کے معاہدے کی خواہش کا اظہار کر دیا۔ نادرا کی جانب سے الیکشن کمیشن کو لکھے گئے خط میں کہا گیا کہ آئی ووٹنگ کے لیے 2.4 ارب روپے کا نیا معاہدہ کرنا چاہتے ہیں۔ نادرا نے مزید کہا کہ الیکشن کمیشن آئی ووٹنگ سے متعلق نادرا کے مجوزہ نظام پر مثبت پیشرفت کرے۔ الیکشن کمیشن کی جانب سے چیئرمین نادرا کو لکھے گئے جوابی خط میں کہا گیا کہ نادرا پہلے بتائے اس نے آئی ووٹنگ کا سابق منصوبہ کیوں چھوڑا؟ آئی ووٹنگ کے سابق منصوبے پر 6 کروڑ 65 لاکھ روپے خرچ ہو چکے تھے۔ الیکشن کمیشن نے نادرا کے خط پر ردعمل دیتے ہوئے کہا ہے کہ اگر چھوڑے گئے نظام میں کوئی خامیاں تھیں تو اس کا ذمہ دار کون ہے؟ الیکشن کمیشن نے مزید کہا ہے کہ خط کے متن سے ایسا تاثر ملتا ہے کہ نادرا الیکشن کمیشن کو حکم دے رہا ہے۔ نادرا کے خط میں اختیار کئے گئے لہجے کو مایوس کن قرار دیتے ہوئے الیکشن کمیشن نے کہا کہ ایسا تاثر دیا گیا کہ الیکشن کمیشن نادرا کا ماتحت ادارہ ہے۔ انتخابات کے انعقاد کیلئے کسی نئے طریقہ کار پر عملدرآمد الیکشن کمیشن کی ذمہ داری ہے۔

ایڈیشنل سیشن کورٹ اسلام آباد کے سیکٹر ای الیون میں لڑکے اور لڑکی پر تشدد کیس کے ملزمان پر فرد جرم عائد کرنے کیلئے تاریخ مقرر کر دی۔ عثمان مرزا سمیت 5 ملزمان کو ایڈیشنل سیشن کورٹ اسلام آباد میں پیش کیا گیا۔ ملزمان میں چالان کی نقول تقسیم کی گئیں، مرکزی ملزم عثمان مرزا سمیت7 ملزمان پر فرد جرم عائد کرنے کے لیے 28 ستمبر کی تاریخ رکھی گئی ہے۔ وفاقی دارالحکومت اسلام آباد کے تھانہ گولڑہ میں ملزمان کے خلاف تشدد اورغیر اخلاقی ویڈیو بنانے کا مقدمہ سرکار کی مدعیت میں درج ہے جس میں اسلام آباد پولیس کے سب انسپکٹر مدعی ہیں۔ ایف آئی آر کے مطابق واقع ای الیون ٹو اپارٹمنٹس میں پیش آیا تھا۔ پولیس حکام کے مطابق متاثرہ لڑکا اور لڑکی گھر میں موجود تھے کہ اسی دوران مرکزی ملزم اپنے دوستوں سمیت وہاں پہنچ گیا۔ ملزم عثمان مرزا نے دونوں کو اسلحے کے زور پر حبس بے جا میں رکھا جب کہ لڑکی کی غیر اخلاقی ویڈیو بھی بنائی۔ پولیس نے بتایا ہے کہ مرکزی ملزم عثمان پیسوں کے لیے لڑکے اور لڑکی کو بلیک میل کر رہا تھا۔ ملزم دونوں کو بلیک میل کر کے کئی لاکھ روپے بٹور چکا تھا۔ سرکاری وکیل نے کہا کہ ملزمان نے لڑکی کو برہنہ کر کے اڑھائی گھنٹے کی ویڈیو بنائی اور زیادتی کرانے کی کوشش کی گئی۔ 375 اے سمیت دیگر نئی دفعات شامل کی گئیں ہیں۔ یہ ویڈیو 6 جولائی کو وائرل ہوئی جبکہ ویڈیو گزشتہ سال بنائی گئی تھی۔

پٹرول کی قیمتوں پر فواد چوہدری کا ردعمل، قیمتوں میں اضافے کی وجہ عالمی منڈی میں بڑھتی قیمتوں کو قرار دیدیا۔ کہتے ہیں کہ پیٹرول کی قیمت پاکستان میں اب بھی خطے میں سب سے کم ہے۔ گزشتہ روز حکومت نے پٹرول کی قیمتوں میں اضافہ کردیا تھا۔ حکومت کی جانب سے پیٹرول پر پانچ روپے اضافہ کردیا،مٹی کا تیل، لائٹ ڈیزل، ہائی اسپیڈ ڈیزل بھی پانچ پانچ روپے سے زائد مہنگا کیا گیا ہے۔ اس پر عوام کا سخت ردعمل سامنے آیا جبکہ دوسری جانب حکومتی وزراء اور رہنماؤں نے دفاع کیا اور پٹرولیم مصنوعات کی قیمتوں میں اضافے کی وجہ عالمی منڈی کو قرار دیا، ان کا کہنا تھا کہ اگر عالمی منڈی میں پٹرول مہنگا ہوتو حکومت کیسے سستا دیدے؟ دنیا نیوز نے صحافی اجمل جامی نے فوادچوہدری پر طنز کیا اور کہا کہ چوہدری صاحب! وہ ذرا خطے کے دیگر ممالک میں "صرف" پٹرولیم مصنوعات کی قیمتوں کیساتھ موازنے والا گراف ایک بار پھر پوسٹ کر دیں، آپکی گیلری میں ہوگا۔۔۔ نیز اسکے فوائد پر بھی ہلکی سی روشنی ڈال دیجئے۔ اجمل جامی کو فوادچوہدری نے جواب دیا کہ یپاکستان میں تیل کی قیمتیں اب بھی ریجن میں سب سےکم ہیں، یا تو تین سالوں میں تیل کے کنوئیں نکل آتے ورنہ ظاہر ہے جب آپ نے تیل باہر سے خریدنا ہے تو قیمت بڑھے گی تو قیمتیں بڑھیں گی، یہی اصول باقی درآمدات کیلئے ہے۔اصل کامیابی یہ ہےکہ75 فیصد آبادی کی آمدنی میں بھی خاطر خواہ اضافہ ہوا ہے ایک اور سوشل میڈیا صارف کو جواب دیتے ہوئے فواد چوہدری نے لکھا کہ پاکستان کی قوت خرید ہندوستان سے بہتر ہے، تنخواہ دار طبقے کی مشکلات اپنی جگہ لیکن 60 فیصد آبادی زراعت سے وابستہ ہے جن کی کو 1100 ارب روپے اضافی آمدنی ہوئ، تعمیرات اور انڈسٹری سے وابستہ کروڑوں لوگوں کی آمدن میں بھی اضافہ ہوا، مستری اور مزدور کی دیہاڑی تین گنا بھی بڑھی

وزیرِ اعظم عمران خان دو روزہ دورے پر دوشنبے تاجکستان پہنچ گئے ہیں ، وزیرِ اعظم تاجکستان قاھر رسول زادہ نے وزیرِ اعظم عمران خان کا استقبال کیا۔ وزیرخارجہ شاہ محمود قریشی، وزیر بحری امور علی زیدی ، وزیر اطلاعات فواد چوہدری، مشیر تجارت عبدالرزاق داؤد اور مشیر قومی سلامتی ڈاکٹر معید یوسف بھی وزیراعظم عمران خان کے ہمراہ ہیں۔ وزیرِ اعظم عمران خان دوشنبے میں پاکستان تاجکستان بزنس فورم میں شریک ہونگے. بزنس فورم پاکستان اور تاجکستان میں تجارت بڑھانے کے حوالے سے اہمیت کا حامل ہے۔ فورم وزارت تجارت، سرمایہ کاری بورڈ اور ٹریڈ ڈویلپمنٹ اتھارٹی آف پاکستان کے تعاون سے منقعدہ کیا جارہا ہے، فورم میں 67 پاکستانی جبکہ 150 تاجک کمپنیاں شریک ہو رہی ہیں۔ فورم میں شریک کمپنیوں کا تعلق ٹیکسٹائل، چمڑے کی صنعت، فارماسوٹیکل، ایگریکلچر، مائننگ، ٹورازم، لاجسٹکس کے شعبے سے ہے۔ وزیرِ اعظم اس موقع پر خطاب بھی کریں گے، پاکستان ٹیلی ویژن نشر کرے گا۔

سابق وزیراعلیٰ سندھ اور پیپلز پارٹی کے رہنما سید قائم علی شاہ کو تاحال گرفتار نہ کیا جاسکا، جس پر سندھ ہائیکورٹ نے برہمی کا اظہار کیا ہے، سندھ ہائیکورٹ میں قائم علی شاہ کے خلاف شہداد پور میں زمین کی الاٹمنٹ کے کیس کی سماعت ہوئی،نیب پراسکیوٹر نے عدالت کو بتایا کہ ملزمان کے خلاف ایک ریفرنس دائر ہوچکا ہے اور ضمنی ریفرنس دائر کرنے کے لئے مزید انکوائری جاری ہے،جس پر عدالت نیب پراسکیوٹر سکھرعبید ابڑو پر برہم ہوئی۔ جسٹس اقبال کلہوڑو نے ریمارکس دیئے کہ اگر قائم علی شاہ کی انکوائری میں ضرورت نہیں تو پھر کیس نمٹا دیتے ہیں،نیب نے قائم علی شاہ کو گرفتار نہیں کرنا تو پھر سندھ ہائیکورٹ میں کیس چلانے کی ضرورت نہیں، سندھ ہائیکورٹ نے مزید کہا کہ جب حتمی ریفرنس دائر ہوجائے توملزم خود ٹرائل کورٹ میں پیش ہوجائیگا۔ دوسری جانب نیب پراسیکیوٹر نے اس حوالے سے بتایا کہ ریفرنس دائر کرنے کے لیے معاملہ نیب ہیڈ کوارٹر کو ارسال کیا تھا لیکن ہیڈ کوارٹر نے کچھ اعتراضات لگا دیے تھے جو تاخیر کا باعث بنے،نیب پراسیکیوٹرعبید اللہ ابڑو نے تحریری جواب جمع کروایا کہ قائم علی شاہ کو گرفتار کرنے کا ارادہ نہیں رکھتے،عدالت نے قائم علی شاہ کی درخواست ضمانت نمٹاتے ہوئے نیب کا تحریری جواب ریکارڈ کا حصہ بنا لیا۔ اس سے قبل قائم علی شاہ نے نیب کے سامنے پیش ہونے سے انکار کر تے ہوئے نیب کے تفتشی افسرپر تحفظات کا اظہار کر دیا تھا اور کہا تھا کہ نیب کے تفتیشی افسر مجھے ذاتی رنجش کا نشانہ بنارہے ہیں، معاملے پر پہلے عدالت سے رجوع کر ونگا اور پھر نیب میں پیش ہوں گا،نیب کے مطابق ملیر ڈیولپمنٹ اتھارٹی میں زمین کی الاٹمنٹ سے متعلق جو دو رپورٹیں پیش ہوئیں ان میں قائم علی شاہ کا نام نہیں تھا تاہم تیسری رپورٹ میں ان کا نام ہونے کی بنا پر تفتیش کے لیے طلب کیا گیاتھا۔

رینجرز نے کراچی میں کارروائی کرتے ہوئے منشیات فروشی میں ملوث 2 پولیس اہلکاروں کو گرفتار کرلیا ہے۔ خبررساں ادارے کی رپورٹ کے مطابق 2 روز قبل گرفتار ہونے والے پولیس اہلکاروں سے 8 کلو چرس بھی برآمد کرلی گئی ہے۔ رپورٹ کے مطابق سچل تھانے کے 2 پولیس اہلکاروں سے تفتیش کے دوران انکشاف ہوا ہے کہ مبینہ طور پر ڈی ایس پی پولیس کا ایک گن مین بھی ان دونوں کا ساتھی تھا جسے پولیس اہلکاروں کی گرفتاری کے بعد غائب کردیا گیا ہے۔ رپورٹ میں کہا گیا ہے کہ سچل پولیس نے شہر میں منشیات فروشوں کے خلاف کارروائی کرتے ہوئے 2 ملزمان کو گرفتار کیا تھا جن سے 16 کلو چرس برآمد کی گئی تھی۔ رپورٹ میں الزام کیا گیا کہ ڈی ایس پی اور ایس ایچ او نے مبینہ طور پر رشوت لے کر ملزمان کو چھوڑدیا اور برآمد کی گئی چرس میں سے 8 کلوگرام فروخت کرنے کیلئے تھانے کے 2 پولیس اہلکاروں کو دیدی گئی۔ دونوں پولیس اہلکار سینئر افسران کی ہدایات پر منشیات فروخت کررہے تھے کہ انہیں رینجرز نے دھر لیا، رینجرز ملزمان کے تیسرے ساتھی کی گرفتاری کیلئے بھی تلاش جاری رکھے ہوئے ہے۔

وزارت سائنس اینڈ ٹیکنالوجی نے الیکشن کمیشن کا الیکٹرانک ووٹنگ مشین کے سورس کوڈ تک رسائی کا مطالبہ مسترد کرتے ہوئے معذرت کرلی۔ تفصیلات کے مطابق الیکشن کمیشن کی جانب سے الیکٹرانک ووٹنگ مشین (ای وی ایم) کے ہارڈ ویئر اور سافٹ ویئر کی تفصیلات مانگی گئی تھی جبکہ وزاررت سائنس نے الیکشن کمیشن کا مطالبہ مسترد کرتے ہوئے موقف اختیار کیا کہ سورس کوڈ فوری طور پر نہیں دیا جا سکتا، کنسٹرکشن ڈیزائن اور سورس کوڈ کے چوری ہونے کا خطرہ لاحق ہے۔ اس حوالے سے وزیر وزارت سائنس اینڈ ٹیکنالوجی شبلی فراز نے وضاحت کی کہ الیکشن کمیشن کو معلومات کی فراہمی سے انکار نہیں تاہم تکنیکی معلومات کمپنیز سے معاہدے کے بعد فراہم کی جائیں گی۔ واضح رہے کہ ای سی پی نے وزارت سائنس اینڈ ٹیکنالوجی کی جانب سے متعارف کی گئی ای وی ایم پر اعتراضات کیے تھے جس کے بعد حکومت نے الیکٹرانک ووٹنگ مشین کا بین الاقوامی ماہرین سے معائنہ کرانے کا فیصلہ کیا ہے، معائنے کے لئے فافن اور پلڈاٹ کوالیکٹرانک ووٹنگ مشین کو دیکھنے کی دعوت دی گئی ہے۔

لاہور سیشن کورٹ نے یوم آزادی کے موقع پر رکشہ میں سوار خاتون سے نازیبا حرکات کرنے کے الزام میں گرفتار ملزمان کی درخواست ضمانت خارج کر دی۔ تفصیلات کے مطابق رکشہ میں سوار خاتون سے نازیبا حرکات کرنے والے ملزمان کو جوڈیشل مجسٹریٹ حسن سرفراز چیمہ کے روبرو پیش کیا گیا۔ ملزمان عبدالرحمان ٫عثمان٫ عاطف اور عرفان نے اپنے وکلاء کی وساطت سے ضمانت کی درخواست دائر کی تھی جبکہ جوڈیشل مجسٹریٹ نے کیس کا فیصلہ سناتے ہوئے درخواست ضمانت خارج کر دی۔ پولیس نے رپورٹ عدالت میں جمع کرائی اور کہا چاروں ملزمان نے رکشہ ‏میں بیٹھی لڑکی سے نازیبا حرکات کی تھیں، پولیس کا مزید کہنا تھا کہ متاثرہ لڑکی نے ملزمان کو جیل میں جا کر شناخت کیا تھا مقدمہ درج ہونے پر ملزمان کو ‏پولیس نے گرفتار کیا۔ ‏ واضح رہے کہ یوم آزادی کے موقع پر رکشے میں موجود خواتین کے ساتھ بدسلوکی کی ویڈیو سامنے آئی تھی ، ‏جس میں اوباش نوجوان رکشے میں سوار خواتین کو ہراساں کرتے رہے۔ لاری اڈا پولیس نے ملزمان کیخلاف مقدمہ درج کرکے کارروائی شروع کی تھی۔

وزیر تعلیم سندھ سعید غنی نے محکمہ تعلیم کی جانب سے سرکاری سکولوں کیلئے 29 ہزار میں ایک ڈیسک خریدنے کے معاملے کا ملبہ وزیر اعلی سندھ مراد علی شاہ پر ڈال دیا ہے۔ خبررساں ادارے کی رپورٹ کے مطابق کراچی میں پریس کانفرنس سے خطاب کرتے ہوئے سعید غنی نے مہنگے ڈیسک کی خریداری کے معاملے پر ردعمل دیتےہوئے کہا کہ جب اس خریداری کا ٹینڈر ہوا تو اس وقت وزارت تعلیم کا قلمدان وزیراعلی سندھ مراد علی شاہ کے پاس تھا۔ سعید غنی نے کہا کہ مجھے اس خریداری سے متعلق کوئی علم نہیں ہے یہ مجھے قلمدان ملنے سے پہلے کا ٹینڈر ہے۔ سندھ اسمبلی میں قائد حزب اختلاف حلیم عادل شیخ نے بھی اس اسکینڈل کو بے نقاب کرتے ہوئے کراچی کی لیاقت آباد فرنیچر مارکیٹ پہنچ کر نئی ڈیسک کی خریداری کرتے ہوئے سندھ حکومت کی کرپشن کو بے نقاب کیا تھا۔ حلیم عادل شیخ نے فرنیچر مارکیٹ سے ایک نئی ڈیسک پانچ ہزار روپے کی خریدی اور کہا کہ سندھ حکومت اس منصوبے کے مد میں 3 ارب کا ٹیکہ لگانے کی تیاری کررہی ہے، کیا سندھ حکومت کے ڈیسک سونے سے بنی ہوئی ہے، سندھ حکومت کی کرپشن سے وزیراعلیٰ ہاؤس پلتا ہے اور بلاول بھٹو کے ناشتے کے پیسے نکلتے ہیں۔ واضح رہے کہ کچھ روز پہلے انکشاف ہوا تھا کہ محکمہ تعلیم سندھ نے سرکاری اسکولوں کے طلباء کے بیٹھنے جو ڈیسک خریدنے کی منظوری دی ہے، فی ڈیسک 29 ہزار روپے کے عوض خریدی جائے گی۔ رپورٹ کے مطابق ان ڈیسکس کو کباڑ کے ٹکڑوں سے بنایا جائے گا جس میں 23 جوڑ لگے ہوں گے، محکمہ تعلم سندھ نے یہ ٹھیکہ ایک کمپنی کو اسی سال میں دیا ہے جس سال میں پہلے ایک ڈیسک 8 ہزار روپے میں خریدی گئی تھی۔