نجی ٹی چینل چینل ہم نیوز کے ایک پروگرام میں تجزیہ کار ثنابُچہ نے ایک سوال کے جواب میں کہا کہاپوزیشن سچ میں حکومت گرانا چاہتی ہے تو استعفے دیں، لانگ مارچ سے قوم کا وقت برباد نہ کریں۔
پروگرام "پاکستان ٹونائٹ" میں میزبان نے ثنا بُچہ سے سوال کیا کہ وہ کیا سمجھتی ہیں کہ اب اپوزیشن کی جانب سے پھر لانگ مارچ کا اعلان کیا جا رہا ہے تو کیا حکمت عملی اپنائی گئی ہو گی۔ اس پر تجزیہ کرتے ہوئے تجزیہ کار ثنا بُچہ نے کہا کہ میرا اپوزیشن کو یہ مشورہ ہے کہ اگر وہ سچ میں حکومت کو گرانا ہی چاہتے ہیں تو استعفے دے دیں اس سے حکومت گر جائے گی ورنہ ایسے لانگ مارچ کر کے پاکستانی قوم کا وقت برباد نہ کریں۔
میزبان نے وزیراعظم کے اس بیان کا حوالہ بھی دیا کہ ان کا ماننا ہے کہ پاکستان میں دیگر ممالک کی نسبت مہنگائی سب سے کم ہے تو اس پر تحریک انصاف کے اوورسیز سپورٹرز ویڈیوز بنا رہے ہیں کہ امریکا، انگلینڈ، سپین و دیگر ممالک میں پٹرول پاکستان کے مقابلے زیادہ مہنگا ہے۔
اس سوال کے جواب میں انہوں نے کہا کہ اگر ایسا ہے تو وہ سب لوگ جن کو لگتا ہے کہ پاکستان اب بھی ان ممالک سے سستا ہے تو وہ سب کچھ چھوڑ کر واپس آ جائیں یہاں آکر سستی زندگی جی لیں اور بتائیں کہ وہ پہلے جتنے پیسے اپنے گھر بھیجتے تھے کیا اب بھی اتنے ہی بھیج رہے یا پھر پہلے سے کم بھیجتے ہیں۔
ثنابُچہ نے کہا کہ وہ پاکستانی جن کو لگتا ہے کہ ان کی من پسند حکومت یہاں سب اچھا چلا رہی ہے تو ان کو چاہیے کہ وہ یہاں آئیں اور ملک کی خدمت یہاں رہ کر کریں اپنے پسندیدہ لیڈر کو ووٹ ڈالیں تاکہ ان کا ووٹ ڈالنے کا دیرینہ مسئلہ بھی حل ہو جائے۔
