حکومت میں شامل تمام اتحادی جماعتوں نے پاکستان تحریک انصاف کے لانگ مارچ کو اسالام آباد داخلے سے روکنے کا متفقہ فیصلہ کرلیا ہے۔
تفصیلات کے مطابق یہ فیصلہ وزیراعظم ہاؤس میں پاکستان ڈیموکریٹک موومنٹ اور دیگر حکومتی اتحادی جماعتوں کے اہم اجلاس میں کیا گیا،اجلاس میں ملک کی مجموعی سیاسی صورتحال اور پی ٹی آئی کے ممکنہ لانگ مارچ کے معاملے پر تبادلہ خیال کیا گیا۔
وفاقی وزیر داخلہ رانا ثناء اللہ نے اجلاس کے شرکاء کو بریفنگ دیتے ہوئے بتایا کہ حکومت نے عمران خان کے ممکنہ لانگ مارچ کے حوالے سے تیاری مکمل کرلی ہے۔
ذرائع کے مطابق اجلاس میں فیصلہ کیا گیا ہے کہ عمران خان کے لانگ مارچ کو کسی صورت بھی اسلام آباد داخلے کی اجازت نہیں دی جائے گی، اس حوالے سے وزیراعظم نے تمام اتحادی جماعتوں کے رہنماؤں پر مشتمل 2 کمیٹیاں تشکیل دیں جس میں پارٹی ترجمان اور قانونی ماہرین شامل ہوں گے، ان کمیٹیوں میں ہر جماعت سےایک ایک رکن کو شامل کیا جائے گا۔
وفاقی حکومت اور اتحادی جماعتوں نے پنجاب اور کے پی کے حکومتوں کو وارننگ دیدی کہ وہ عمران خان کی آلہ کار بن کر وفاق پر چڑھائی سے باز رہیں نہیں تو آئین اور قانون کا سامنا کرنا پڑیگا۔
ترجمانوں کی کمیٹی کو عمران خان کے بیانیے کے جواب میں حکومتی بیانیہ عوام تک پہنچانے کی ذمہ داری سونپی گئی ہے جبکہ قانونی کمیٹی قانونی امور پر رہنمائی کرے گی۔
اجلاس میں وفاقی وزیر خزانہ اسحاق ڈار نےشرکاء کو ملکی معیشت، پیٹرولیم مصنوعات کی قیمتوں میں کمی کے فیصلے، آئی ایم ایف کے ساتھ مذاکرات اورڈالر کی قدر میں کمی سے متعلق امور پر بریفنگ دی، اجلاس کے شرکاء نے نئے وزیرخزانہ کے اقدامات پر اطمینان کا اظہار کیا اور کہا کہ روپے کی قدر میں بہتری اور پیٹرولیم مصنوعات کی قیمتوں میں کمی سے عوام میں حکومتی ساکھ بہتر ہوگی۔