وزیراعظم شہباز شریف نے عمران خان پر تنقید کرتے ہوئے کہا ہے کہ عمران خان صرف اقتدار کے حصول کی سیاست کرتے ہیں چاہے اس سے ملک کو کتنا ہی نقصان کیوں نا پہنچ جائے۔
تفصیلات کے مطابق سابق وزیراعظم عمران خان کے حالیہ انٹرویو میں دیئے گئے بیانات پر ردعمل دیتے ہوئے وزیراعظم شہباز شریف نے ایک ٹویٹ کی اور کہا کہ عمران خان کا پارلیمانی جمہوریت کے خلاف حالیہ بیان ترقی یافتہ ممالک میں کامیاب جمہوریت پر حملوں کے سلسلے کی ایک کڑی ہے۔
وزیراعظم نے مزید کہا کہ عمران خان کی سیاست کا مقصد اقتدار میں اپنا راستہ بنانا ہے چاہے اس سے ملک کی بنیادوں کو ہی کمزور نا کرنا پڑے۔
وزیراعظم شہباز شریف کے عمران خان پر اس لفظی حملے کے جواب میں پی ٹی آئی رہنما فواد چوہدری نے ٹویٹ داغی اور کہا کہ چور دروازے سے وزیراعظم کی کرسی پر قبضہ کرنے والاشخص اپنی حکومت کو پارلیمانی جمہوریت قرار دے رہا ہے،سیاسی کارکنوں، صحافیوں کے ساتھ جو مظالم ان سات مہینوں میں ہوئے ان کا حساب ضرور ہوگا۔
فواد چوہدری نے وزیراعظم شہباز شریف کو مخاطب کرتے ہوئے کہا کہ آپ نے ملک میں ایسا نظام تشکیل دیا ہے کہ لوگوں کا جمہوریت سے اعتماد ہی اٹھ گیا ہے۔
