سابق وزیراعظم عمران خان نے چیئرمین واپڈا کی جانب سے اپنے عہدے سے مستعفیٰ ہونے سے متعلق فیصلے پر تشویش کا اظہار کردیا ہے۔
مائیکروبلاگنگ ویب سائٹ ٹویٹر پر سابق وزیراعظم عمران خان نے سیاست ڈاٹ پی کے کی جانب سے چیئرمین واپڈا لیفٹیننٹ جنرل(ر) مزمل حسین کے استعفیٰ سے متعلق خبر کو شیئر کیا اور انہیں خراج تحسین پیش کیا ۔
عمران خان نے اپنے بیان میں کہا کہ لیفٹیننٹ جنرل (ر) مزمل حسین ایک غیر معمولی پیشہ ورانہ صلاحیت کے مالک انسان ہیں جس نے جذبہ، قابلیت اور حب الوطنی کو یکجا کرکے اپنے فرائض سرانجام دیئے۔
سابق وزیراعظم نے مزید کہا کہ تاہم مجھے یہ فکر ہے کہ ایسے شخص کی رخصتی ہمارے ڈیم پروگرام پر منفی اثرات مرتب کرسکتی ہے۔
واضح رہے کہ چیئرمین واپڈا لیفٹیننٹ جنرل (ر) مزمل حسین نے آج اپنے عہدے سے مستعفیٰ ہونے کا اعلان کرتے ہوئے کہا ہے کہ وہ موجودہ حکومت کے ساتھ کام نہیں کرسکتے۔
انہوں نے اپنا استعفیٰ وزیراعظم شہباز شریف کو بھجوادیا ہے جس میں کہا گیا ہے کہ میں اپنے ذاتی اور خاندانی وجوہات کے باعث اس عہدے پر مزید کام نہیں کرسکتا۔
