پشاور کے ایک سرکاری اسکول کے پرنسپل نے طلباء کو ایئر کنڈیشنڈ کلاس رومز، سولر سسٹم،لنچ رکھنے کے لیے فریج، گرم کرنے کیلئے مائیکروویو اوون اور پنکھے جیسی سہولیات فراہم کرکے پرائیویٹ اسکولوں کو بھی پیچھے چھوڑ دیا۔
تفصیلات کے مطابق گورنمنٹ ہائیر سیکنڈری اسکول گلبہار کے پرنسپل پرویز مروت نے ماڈل سکول بنانے کے لیے سرکاری فنڈز کا درست استعمال کر کے بڑے بڑے پرائیویٹ اسکولوں کو بھی پیچھے چھوڑ دیا اور طلبا کو تمام سٹیٹ آف دی آرٹ اسکولوں والی سہولیات فراہم کر دی ہیں۔
پرنسپل پرویز مروت نے کہا صوبائی حکومت تمام سرکاری سکولوں کو بنیادی سہولیات فراہم کر رہی ہے لیکن اکثر سکولوں کے پرنسپل اور اساتذہ ان سہولیات پر فنڈز خرچ نہیں کرتے ہیں۔
ان کا کہنا تھا کہ میرے اسکول گورنمنٹ ہائی سیکنڈری سکول گلبہار کے طلبا کو پینٹ شرٹس اور ٹائی لگائے دیکھ کر کسی پرائیویٹ تعلیمی ادارے کا خیال آتا ہے سرکاری فنڈز کا بروقت اور درست استعمال کر کے سرکاری سکول کو بہترین بنایا جا سکتا ہے۔
اسکول کے انفرااسٹرکچر اور ان سہولیات سے مزین کلاس رومز کی جو تصاویر سامنے آئی ہیں ان میں کلاس روم میں اے لگا دیکھا جا سکتا ہے جبکہ طلبا بھی انتائی نفیس انداز سے اُجلے یونیفارم کے ساتھ ٹائی لگائے بیٹھے دیکھے جا سکتے ہیں۔
جبکہ ایک تصویر میں طلبا مائیکروویو اوون میں کھانا گرم کر ہے ہیں اور چھت پر سولر پینلز کی بڑی تعداد بھی دیکھی جا سکتی ہے۔