پاکستانی اوپننگ بیٹسمین محمد رضوان شکست کےبعد تنقید کا نشانہ بننے والے بھارتی ٹیم کےواحد مسلمان کھلاڑی محمد شامی کے حق میں بول پڑے ہیں۔
ٹی 20 ورلڈ کپ کے پہلے میچ میں پاکستان کے ہاتھوں بدترین شکست کھانے کے بعد بھارتی ٹیم کو شدید تنقید کاسامنا کرنا پڑا ہے تاہم اس تنقید کے دوران بھارتی ٹیم کے واحد مسلمان کھلاڑی محمد شامی کے خلاف نسلی و مذہبی تعصب سے بھرپور مہم چلائی گئی۔
بھارتی سوشل میڈیا صارفین اور کرکٹ شائقین نے شکست کا ذمہ دار محمد شامی کو ٹھہراتے ہوئے انہیں غدار اور پاکستانی ایجنٹ تک کے القابات سے نوازنا شروع کردیا تھا۔ بھارت کی شکست میں اہم کردار ادا کرنے والے پاکستانی اوپننگ بیٹسمین محمد رضوان اس نفرت آمیزمہم کو دیکھتے ہوئے خاموش نہ رہ سکے اور بول پڑے۔
ٹویٹر پر محمد شامی کا ایک اسکیچ شیئر کرتے ہوئے محمد رضوان نے اپنے بیان میں کہا کہ اس بات کوئی انداز ہ بھی نہیں لگاسکتا کہ ایک کھلاڑی اپنے ملک کیلئے کن قربانیوں ، مشکلات اور دباؤ سے ہوکر گزرتا ہے۔
انہوں نے کہا کہ محمد شامی ایک اسٹار کرکٹر ہیں ، ان کا شمار دنیا کے بہترین باؤلرز میں سے ہوتا ہے ، براہ کرم اپنے اسٹارز کی عزت کریں۔
محمد رضوان نے پاکستان اور بھارت کے درمیان کھیل کو تقسیم کے بجائے اتحاد سے تشبیہ دیتے ہوئے کہا کہ کرکٹ لوگوں میں تقسیم پیدا کرنے کیلئے نہیں بلکہ متحد ہونے کا ذریعہ ہونی چاہیے۔