اسلام آباد پولیس کی تنخواہ پنجاب پولیس کے برابر کرینگے: وزیراعظم
اسلام آباد پولیس کے افسران اور جوانوں کی بہادری قابل تعریف ہے: شہباز شریف
وزیراعظم شہبازشریف کی طرف سے اسلام آباد پولیس کی تنخواہیں پنجاب پولیس کی تنخواہوں کے برابر کرنے کا اعلان کر دیا گیا ہے۔ ذرائع کے مطابق وزیراعظم شہبازشریف نے پاکستان تحریک انصاف کے احتجاج کے دوران شہید پولیس کانسٹیبل عبدالحمید کے اہل خانہ سے ملاقات کی اور احتجاج کے دنوں میں فرائض سرانجام دینے والے اہلکاروں کو شاباش دی جس کے بعد وہ پولیس لائنز گئے اور ایک تقریب سے خطاب کے دوران اسلام آباد پولیس کی تنخواہیں بڑھانے کا اعلان کر دیا۔
اسلام آباد پولیس لائنز ہیڈکوارٹرز میں تقریب سے خطاب میں شہبازشریف کا کہنا تھا کہ 2014ء سے ملک میں دھرنوں کی سیاست کا آغاز ہوا جب فسادیوں نے ڈی چوک میں دھرنے دیئے اور قبریں کھودیں۔ چینی صدر نے 2014ء میں پاکستان کا دورہ کرنا تھا لیکن فسادیوں کے احتجاج کے باعث دورہ منسوخ کرنا پڑا اور ملک کو اربوں ڈالر کا نقصان پہنچا۔
تحریک انصاف پر تنقید کرتے ہوئے کہا کہ ایک صوبے کی طرف سے حال ہی میں مرکز پر لشکرکشی کی گئی جو غیرقانونی وغیرآئینی اقدام تھا۔ ایک طرف ملکی ترقی ہے تو دوسری طرف جتھے مرکز پر چڑھائی کر رہے ہیں، گالم گلوچ اور پٹرول بم جنونی جتھے کا وطیرہ بن چکا ہے، فسادیوں کی خواہش تھی کہ لاشیں گریں اور یہ آگ پورے ملک میں بھڑکے۔
انہوں نے کہا کہ اسلام آباد پولیس اور رینجرز کی طرف سے ایسی تمام سازشیں ناکام بنا دی گئیں، بلوچستان، سندھ، پنجاب پولیس میں اصلاحات کر رہے ہیں، خیبرپختونخوا کو مرکز سے کوئی مدد درکار ہے تو اس کیلئے بھی حاضر ہیں۔ اسلام آباد پولیس کی تنخواہیں پنجاب پولیس کے برابر کرنے اور انتظامیہ وپولیس افسران کو ایگزیکٹو الاؤنس دینے کا اعلان کر دیا۔
وزیراعظم شہبازشریف نے اپنے خطاب میں کہا کہ اسلام آباد پولیس کے 64 شہید افسران اور جوانوں میں سے صرف 20 شہداء کو پیکیج ملا تھا، رہ جانے والے 44 شہداء کو بھی پیکیج جلد مل جائے گا۔ تحریک انصاف کے احتجاج کے دوران شہید پولیس اہلکار عبدالحمید شاہ کو خراج عقیدت پیش کرتے ہوئے کہا کہ اسلام آباد پولیس کے افسران اور جوانوں کی بہادری قابل تعریف ہے۔
- Featured Thumbs
- https://www.siasat.pk/data/files/s3/shhebaz-sharif-police.jpg
