حکومتی اتحاد میں شامل جماعتوں نے عمران خان کی جانب سے جلسے میں فوج مخالف بیانات کی شدید مذمت کی ہے، اس سلسلے میں ایک مشترکہ اعلامیہ بھی جاری کر دیا ہے۔
اتحادی جماعتوں کے اعلامیے میں کہا گیا ہے کہ عمران خان نے جلسے میں افواج پاکستان اور اس کی قیادت کے خلاف نفرت پھیلانے اور حساس پیشہ ورانہ امور کو متنازع بنانے کی کوشش کی ہے۔
حکومتی اعلامیے کے مطابق عمران خان کی جانب سے سنگین بہتان تراشی کا مقصد معاشی بحالی کے عمل کو متاثر کرکے پاکستان کو سری لنکا بنانا اورعوام کو فوج سے لڑانا ہے، الزامات کا مقصد فوج کے رینک اینڈ فائل میں تصادم کی راہ ہموار کرنا ہے۔
حکومت نے واضح کیا کہ سازشیوں سے قانون کے مطابق نمٹیں گے جبکہ پاکستان آئین کے مطابق چلے گا۔ مزید کہا گیا ہے کہ پوری قوم سیلاب سے لڑ رہی ہے، نفرت، انتقام اور تکبر میں ڈوبا عمران خان مسلح افواج سمیت قومی اداروں اور عوام سے لڑرہا ہے۔
اعلامیے میں یہ بھی کہا گیا ہے کہ پاکستان کو کسی فرد واحد کے تکبر ، فسطائیت اور آمرانہ رویوں کا غلام بنانے کی اجازت نہیں دی جاسکتی۔ مسلح افواج ملک میں سیلاب متاثرین کی مددکی قابل قدر خدمات انجام دے رہی ہیں۔
اتحادی جماعتوں نے اعلامیے میں تسلیم کیا کہ مسلح افواج دہشت گردی کے خلاف جرات وبہادری اور دلیری سے جنگ لڑرہی ہیں۔ اس جنگ میں فوج کے افسر اور جوان جام شہادت نوش کررہے ہیں۔
حکومت کا کہنا ہے پوری قوم دہشت گردی سے نجات ، معاشی استحکام ، سیلاب متاثرین کی مدد اور بحالی کے ایجنڈے پر متحد اور ایک آواز ہے۔ایک تنہا آواز ہر روز قومی اتحاد کو پارہ پارہ کرنے کے لئے جھوٹ، پراپیگنڈے اور بہتان تراشی کے ذریعے مسلسل نفرت پھیلا رہی ہے۔
حکومتی اتحادی جماعتوں کا کہنا ہے کہ معیشت کی بحالی سمیت قومی مفادات کے تحفظ کا عمل متاثرنہیں ہونے دینگے۔ مسلح افواج سمیت قومی اداروں اور ان کی قیادت کے آئینی احترام اور حدود کی پاسداری کو یقینی بنایا جائے گا۔
عوام بالخصوص سیلاب زدگان کی امداد، بحالی اور ریلیف کے عمل کو ہرگز متاثر نہیں ہونے دیں گے۔ آئین اور قانون کی طاقت سے اس مذموم سازش کو ناکام بنائیں گے۔پاکستان کو کمزور کرنے کے ہر مذموم ایجنڈے کو ناکام بنائیں گے۔
