عوامی مسلم لیگ کے سربراہ شیخ رشید نے کہا ہے کہ اگر عمران خان اور ملکی اداروں کے درمیان جنگ کا ماحول پیدا ہوجاتا ہے تو میں عمران خان کے ساتھ چٹان کی طرح کھڑا ہوں گا۔
سابق وزیر داخلہ شیخ رشید نے یہ دبنگ بیان غیر ملکی ٹی وی چینل کو انٹرویو دیتے ہوئے دیا اور کہا کہ ہم سب ایک پیج پر تھے، ہمارے فوج کے ساتھ معاملات اچھے چل رہے تھے مگر پھر اچانک اس اتفاق کو ایک نظر لگ گئی اور ہمارے درمیان غلط فہمیاں پیدا ہونا شروع ہوگئیں اور یہی غلط ہوا۔
انہوں نے کہا کہ پاک فوج ہمیشہ جمہوریت کا فائدہ سوچتی ہے اور ہر منتخب حکومت کے ساتھ ہوتی ہے مگر کچھ تو ایسا ہوا ہوگا جو ایم کیو ایم اور باپ پارٹی اور آدھی ق لیگ نے ہماری حکومت کو چھوڑا ، ہم سے کہیں نا کہیں کوئی غلطی ضرور ہوئی ہے۔
شیخ رشید نے کہا کہ عمران خان کو اداروں کے خلاف کھڑا نہیں ہونا چاہیے، ہمیں اداروں کےساتھ مل ملک کو انتخابات کی طرف لے کر جانا ہوگا میں اس معاملے میں بطور ثالث کردار ادا کرنے کیلئے تیار ہوں، تاہم اگر عمران خان اداروں سے جنگ لڑتے ہیں تو اس میں کوئی شک نہیں ہونا چاہیے کہ میں ایک چٹان کی طرح عمران خان کے ساتھ کھڑا رہوں گا۔
سابق وزیرداخلہ نے کہا کہ میرا حلقہ پنڈی ہے پاکستان کے تمام ادارے میرے حلقے میں آتے ہیں ، میری پہلی کوشش صلح صفائی کی ہوگی، اس لڑائی میں میں عمران خان کو حق بجانب سمجھتا ہوں اور مانتا ہوں کہ اس کے ساتھ زیادتی ہوئی ہے،عمران خان اسلام آباد میں ایک لاکھ لوگ لے آئیں تو مسائل کا حل نکل سکتا ہے ورنہ جھاڑو بھی پھر سکتا ہے ایسا ہوا تو نہ ہم رہیں گے نا وہ، عمران خان مارشل لاء کےحق میں نہیں ہیں وہ ملک میں جلد از جلد انتخابات چاہتے ہیں۔