اسلام آباد میں تیندووں کی موجودگی کے باعث شہریوں میں خوف و ہراس برقرار ہے، ڈپٹی کمشنر آفس اسلام آباد نے تیندووں کی موجودگی کے باعث الرٹ جاری کردیا ہے۔
ضلعی انتظامیہ کا کہنا ہے کہ گزشتہ رات گاؤں گھوکینا کے پاس کچھ موٹرسائیکل سواروں نے تیندوے کو دیکھا، جو ڈر کی وجہ سے گر کر زخمی بھی ہوئے،ضلعی انتظامیہ کے مطابق کل بھی سیدپور کے آس پاس تیندوے دیکھے گئے، شہری مونال روڈ پر سفر کریں تو 2، 3 موٹرسائیکلیں اکٹھی سفر کریں۔
ضلعی انتظامیہ کا کہنا ہے کہ تیندوے کو پکڑنے کے لیے اقدامات کیے جا رہے ہیں، جب تک اسے پکڑ نہیں لیا جاتا ٹریل تھری کو وقتی طور پر بند کر دیا،انتظامیہ کا کہنا ہے کہ پولیس کی نفری اور محکمہ وائلڈ لائف کے اہلکار علاقوں میں تعینات ہیں، شہری کسی بھی ہنگامی صورتحال میں 15 پر اطلاع دیں۔
گزشتہ روز وائلڈ لائف حکام نے گاؤں سیدپور میں تیندوؤں کے آنے کی تصدیق کرتے ہوئے کہا تھا کہ گھروں کی چھتوں پر تیندووں کے پاؤں کے نشانات موجود ہیں،عینی شاہدین کے مطابق انہوں نے کل چھ چیتے دیکھے ہیں جن میں سے تین بڑے اور تین چھوٹے بچے ہیں، چیتوں نے اب تک کی اطلاعات کے مطابق ایک بکری کو بھی مار ڈالا ہے۔