چیئرمین پاکستان تحریکِ انصاف عمران خان کی سابقہ اہلیہ اور برطانوی فلم ساز جمائما گولڈ اسمتھ نے پاکستان کی موجودہ سیاسی صورتحال پر ردعمل دیتے ہوئے کہا میرے بچوں کے نام سے جعلی اکاؤنٹس بنائے گئے ہیں جوکہ ایک سیاسی ایجنڈے کے تحت جعل سازوں نے پاکستان سے بنائے ہیں۔
ٹوئٹر پر جمائما گولڈ اسمتھ نے جعلی اکاؤنٹس کے اسکرین شاٹس شیئر کرتے ہوئے لکھا یہی وہ چیز ہے جس کا مجھے اس وقت ڈر تھا جب ایلون مسک نے ٹوئٹر اکاؤنٹس کی تصدیق کے لیے موجود بلیو ٹکس کو ہٹا دیا تھا۔
جمائما گولڈ اسمتھ نے مائیکرو بلاگنگ ویب سائٹ ٹوئٹر پر فرزانہ امجد نامی ایک صارف کے سوال کے جواب میں ایلون مسک کا ٹوئٹر پر اصل اکاؤنٹس کی تصدیق کے لیے بلیو ٹکس کی بحالی کے لیے شکریہ ادا کیا۔
جمائما گولڈ اسمتھ نے سوال کرنے والی ٹوئٹر صارف سے مخاطب ہوتے ہوئے لکھا کہ’آپ کی اطلاع کے لیے بتا دوں کہ میرے بچے سوشل میڈیا پر نہیں ہیں اور نہ ہی ان کا سوشل میڈیا پر آنے کا کوئی ارادہ ہے۔
جمائما گولڈ اسمتھ اس سے قبل واضح کرچکی ہیں کہ انہیں اپنی زندگی میں سیاست کی ضرورت نہیں ہے اور سیاسی لڑائیوں سے دور رہنے کے لیے سیاسی معاملات میں بحث کرنے اور حصہ لینے سے گریز کرتی ہیں،جان بوجھ کر سیاسی معاملات سے دور رہتی ہیں تاکہ سیاست سے جڑے تنازعات سے دور رہیں۔
