سابق وزیر داخلہ شیخ کہتے ہیں کہ حکومتی اتحاد مسائل حل کرسکتا ہے نہ الیکشن کرانے کے قابل ہے،تیرہ جماعتی اتحاد نے عمران خان اور پی ٹی آئی کو ہدف بنا رکھا ہے،100 پریس کانفرنسوں کا عالمی ریکارڈ قائم کیا ہے۔
ٹوئٹر پیغام میں شیخ رشید نے کہا کہ حکومتی اتحاد عمران خان کو نااہل کرنا چاہتا ہے، الیکشن کمیشن کا فیصلہ بھونڈا ہے جو سپریم کورٹ میں نیست و نابود اور دفن ہوجائے گا۔
سابق وزیر داخلہ نے مزید کہا کہ حکومتی اقدامات سے سیاست میں مزید انتشاراور خلفشار بڑھے گا،مولانا فضل الرحمان اور نواز شریف انتقامی سیاست کی آگ پر پیٹرول ڈال رہے ہیں، جبکہ پیپلز پارٹی خاموش تماشائی بنی ہوئی ہے۔
اس سے قبل شیخ رشید نے کہا تھا کہ فارن فنڈنگ دفن اور فیصلہ سپریم کورٹ کے پاس چلا گیا ہے،اتحادی اب چاہیں میڈیا میڈیا کھیلیں،نوازشریف کے کیس اور فارن فنڈنگ کیس میں فرق ہے کیونکہ بیان حلفی اور سرٹیفکیٹ میں فرق ہوتا ہے۔
انہوں نے کہا تھا کہ جو آئی ایم ایف سے قرضہ بھی نہ لے سکے ان کی خاک کارکردگی ہے، پانی اور مہنگائی کے سیلاب کے بعد ٹرانسپورٹ بھی بند ہوگئی،شیخ رشید چیف الیکشن کمشنر سکندر سلطان راجہ کے مستعفیٰ ہونے کا مطالبہ بھی کرچکے ہیں۔