تاجر برادری رات ساھے آٹھ بجے بازار بند کرنے سے انکاری ہے، حکومت کی بھی اپنی بات منوانے کی پوری تیاری ہے،وفاقی وزیر برائے منصوبہ بندی احسن اقبال نے کہا ہے کہ تاجر دکانیں جلد کھولنے اور بند کرنے پر آمادہ نہ ہوئے تو رات کے اوقات میں بجلی بہت مہنگی کرنا پڑے گی۔
احسن اقبال نے کہا توانائی بچت پروگرام کے پہلے مرحلے میں سخت اقدامات نہیں کرنا چاہتے لیکن اگر تاجر دکانیں جلد کھولنے اور بند کرنے پر آمادہ نہ ہوئے تو رات کے اوقات میں بجلی بہت مہنگی کرنا پڑے گی۔
انہوں نے پی ٹی آئی کا وائٹ پیپر مسترد کرتے ہوئے کہا کہ سعودی عرب سے پیسے آنے والے ہیں، چین سے قرض رول اوور ہونے والا ہے، پاکستان ڈیفالٹ نہیں کرے گا۔
احسن اقبال کا کہنا تھا کہ آئی ایم ایف پروگرام مکمل کریں گے اور 6 ماہ میں مالی پوزیشن بہتر ہوجائے گی جب کہ حکومت نے اداروں کی نج کاری کرنے کا فیصلہ کرلیا ہے۔
مارکیٹوں اور شادی ہالز کے اوقات کار محدود کرنے کے فیصلے کو کراچی کے تاجروں نے بھی مسترد کرچکے ہیں،کراچی کے تاجروں نے مارکیٹوں اور شادی ہالز کے اوقات کار محدود کرنے کے فیصلے کو مسترد کرتے ہوئے کہا ہے کہ حکومت بدحالی کے فیصلے کر رہی ہے
تاجروں کا کہنا تھا کہ سندھ حکومت نے وفاق کے فیصلے کے بعد ابھی تک حتمی اعلان نہیں کیا، مہنگائی کے باعث پہلے ہی کاروبار بری طرح متاثر ہیں۔
کراچی الیکٹرونکس ڈیلرز ایسوسی ایشن کے صدر رضوان عرفان نے کہا ہے کہ ساڑھے 8 بجے کاروبار اور 10 بجے شادی ہالز اور ریسٹورنٹ بند کرنے کا فیصلہ قابل قبول نہیں، مہنگائی کے باعث پہلے ہی کاروبار بری طرح متاثر ہے، اس فیصلے پر وفاقی حکومت کا فیصلہ کاروبار کے تابوت میں آخری کیل ثابت ہو گا۔
ادھر شادی ہال ایسوسی ایشن کے صدر رانا رئیس نے بھی فیصلے کی مذمت کی اور ہالز رات 10 بجے بند کرنے کو غیر سنجیدہ فیصلہ قر ار دے دیا،وفاق اور محکمہ داخلہ سندھ کی جانب سے اس حوالے سے باضابطہ طور پر آگاہ نہیں کیا گیا۔
