سیکرٹری پاکستان اولمپکس ایسوسی ایشن خالد محمود کی طرف سے بھی ان کے استعفیٰ کی خبر کی تصدیق کی گئی ہے: رپورٹ
صدر پاکستان اولمپک ایسوسی ایشن لیفٹیننٹ جنرل (ر) عارف حسن آخرکار 19 برس بعد اپنے عہدے سے مستعفی ہو گئے۔ نجی ٹی وی چینل جیو نیوز کے پروگرام میں گفتگو کرتے ہوئے لیفٹیننٹ جنرل (ر) عارف حسن نے اپنے فیصلے کی تصدیق کرتے ہوئے بتایا کہ اپنے عہدے سے خرابی صحت کی وجہ سے مستعفی ہو رہا ہوں۔ میرے لیے یہ فیصلہ کرنا آسان نہیں تھا لیکن اپنی صحت پر توجہ دینے کے لیے یہ مشکل فیصلہ کیا، وہ پچھلے کچھ دنوں سے علاج کی غرض سے امریکہ میں ہیں۔
19 برس تک پاکستان اولمپک ایسوسی ایشن کے صدر رہنے والے لیفٹیننٹ جنرل (ر) عارف حسن نے اپنے خط میں لکھا کہ یکم جنوری 2024ء سے اپنے عہدے سے الگ ہو جائوں گا، صحت خراب ہونے پر فیصلہ کیا۔ میری مخلصانہ خواہش ہے کہ پاکستان اولمپکس ایسوسی ایشن ترقی کی منازل طے کرتا رہے اور اس مضبوط بنیاد پر استوار ہو جو ہم نے قائم کی ہے۔
لیفٹیننٹ جنرل (ر) عارف حسن کو پہلی دفعہ 2002ء میں سائوتھ ایشین گیمز کی آرگنائزنگ کمیٹی کے سربراہ کے طور پر نامزد کیا گیا تھا جبکہ مارچ 2004ء کو صدر پی او اے منتخب ہوئے تھے جس کے بعد مسلسل 4 دفعہ اس عہدے پر منتخب ہوتے رہے۔ سیکرٹری پاکستان اولمپکس ایسوسی ایشن خالد محمود کی طرف سے بھی ان کے استعفیٰ کی خبر کی تصدیق کی گئی ہے۔
یاد رہے کہ کچھ دن پہلے سابق وفاقی وزیر ورہنما مسلم لیگ ن احسن اقبال نے سوشل میڈیا ویب سائٹ ایکس (ٹوئٹر) پر اپنے پیغام میں 1990ء سے 2022ء تک ہوئے اولمپکس مقابلے میں بھارت اور پاکستان کی کارکردگی کا موزانہ اور ایشن گیمز میں انتہائی بری کارکردگی دکھانے پر پاکستان اولمپکس ایسوسی ایشن کی انتظامیہ کو بدلنے کا مطالبہ کیا تھا۔
احسن اقبال نے لیفٹیننٹ جنرل (ر) عارف حسن کا نام ٹوئٹ کرتے ہوئے لکھا تھا کہ کیا وہ اپنے عہدے پر رہنے والے برسوں میں پاکستان کے میڈلز جیتنے کی تعداد میں کمی اور بھارتی میڈلز میں اضافہ ہونےکی وضاحت کریں گے؟ پاکستان اولمپکس ایسوسی ایشن کی 2004ء سے سربراہی کر رہے ہیں اور بری کارکردگی کے باوجود تمام ذرائع استعمال کر کے دوبارہ سے خود کو منتخب کروا لیتے ہیں۔
- Featured Thumbs
- https://www.siasat.pk/data/files/s3/13generarffrwttred.png
