کراچی سے لاپتہ ہونےوالی لڑکی دعا زہرہ سے متعلق لاہور پولیس نے دعا زہرہ کو بازیاب کروائے جانے سے متعلق خبروں کی تردید کردی ہے۔
تفصیلات کے مطابق کراچی سے علاقے الفلاح سے لاپتہ ہونے والی لڑکی کے لاہور میں موجودگی سے متعلق انکشاف کے بعد لاہور پولیس نے اہم معلومات جاری کردی ہیں۔
مائیکروبلاگنگ ویب سائٹ پر کیپٹل سٹی پولیس لاہور کی جانب سے جاری کردہ بیان کے مطابق کراچی پولیس نے لاہور پولیس کو دعا کا نکاح نامہ فراہم کردیا ہے جس پر درج ایڈریس سے لڑکی کو تلاش کرنے کی کوششیں جاری ہیں۔
لاہور پولیس کے مطابق دعا زہرہ کو بازیاب کروائے جانے سے متعلق خبروں میں کوئی صداقت نہیں ہے، دعا زہرہ کی بازیابی کے بعد ہی اصل حقائق سامنے آئیں گے۔
بیان میں مزید کہا ہے کہ لاہور پولیس کراچی پولیس سے مسلسل رابطے میں ہے، ٹیمیں تشکیل دیدی گئی ہیں لڑکی کو جلد تلاش کرلیا جائے گا۔
سوشل میڈیا اور میڈیا پر دعا زہرا کے نکاح نامے کی تصویر بھی چل رہی ہے۔
واضح رہے کہ اس سے قبل مختلف ٹی وی چینلز کی جانب سے یہ خبریں سامنے آئی تھیں جس میں کہا گیا تھا کہ کراچی سے لاپتہ ہونے والی دعا زہرہ لاہور سے بازیاب ہوگئی ہے لڑکی اپنی مرضی سے شادی کے بعد لاہور پہنچی۔
