بھارت کے معروف فلمی کریٹک اور فلمی مبصرکے آر کے کہ نام سے مشہور کمال راشد خان نے سلمان خان کو سانپ کے ڈسنے پر کہا کہ سانپ کے سامنے والے (سلمان خان) میں سانپ سے زیادہ زہر تھا۔
دبنگ خان سے عدالتی جنگ لڑنے والے کمال راشد خان نے سلمان خان کو سانپ کے ڈسنے کے واقعے پر غیر مناسب تبصرہ کرتے ہوئے کہا کہ سانپ نے کام تو ٹھیک کیا تھا لیکن سانپ خود ہی مرگیا کیونکہ سامنے والے میں زہر ہی اتنا زیادہ ہے۔
یاد رہے کہ گزشتہ روز سلمان خان کو ان کے پنویل کے فارم ہاؤس میں سانپ نے کاٹ لیا تھا جس کے بعد انہیں فوراً ممبئی کے ایک نجی اسپتال منتقل کیا گیا، خوش قسمتی سے سلمان خان کو کاٹنے والا سانپ زہریلا نہیں تھا۔
علاج کے بعد سلمان خان کو اسپتال سے ڈسچارج کردیا گیا ہے اس وقت بالی ووڈ فلم اسٹار گھر میں آرام کر رہے ہیں۔
بھارتی میڈیا کی رپورٹس کے مطابق جس وقت حادثہ پیش آیا اس وقت سلمان اپنے دوستوں کے ساتھ بیٹھ کر گپ شپ لگارہے تھے کہ اچانک سلمان نے اپنے بازو میں ڈنک محسوس کیا اور ہاتھ کو جھٹک دیا اسی وقت ان کے ایک دوست نے سانپ دیکھا جس کے بعد وہ لوگ گھبراگئے اور مدد کے لیے پکارنے لگے۔
