علیم خان کی نواز شریف سے لندن میں ملاقات کی خبریں، علیم خان کے دوست شعیب صدیقی سینیٹر اعجاز چودھری سے الجھ پڑے۔
تحریک انصاف کی موجودہ حکومت میں سینئر صوبائی وزیر رہنے والے رہنما تحریک انصاف علیم خان کی نوازشریف سے لندن میں ملاقات کی خبریں چل رہی ہیں جس پر تحریک انصاف کے سینیٹر اعجاز چودھری نے کہا کہ علیم خان خفیہ ملاقات میں گھر کے عقبی دروازے سے داخل ہو رہے ہیں یہ وقت بھی آنا تھا۔
اس پر ردعمل دیتے ہوئے علیم خان کے انتہائی قریبی ساتھی شعیب صدیقی جو کہ پی پی 147 لاہور سے ایم پی اے رہ چکے ہیں انہوں نے ردعمل دیتے ہوئے اعجاز چودھری کو کھری کھری سنا دیں اور کہا کہ جماعت اسلامی سے کرپشن کی بنیاد پر نکالے جانے والے اب بتائیں گے کہ کس کا کیسا وقت چل رہا ہے؟ ہر عہدے کی قیمت لگوا کر بیچنے والا اب دوسروں کو تعلیم دے گا؟ یہ وقت بھی آنا تھا۔
یاد رہے کہ سابق سینئر صوبائی وزیر عبدالعلیم خان سے متعلق میڈیا رپورٹس میں دعویٰ کیا جا رہا ہے کہ انہوں نے گزشتہ روز نوازشریف کے ساتھ لندن میں ان کی رہائشگاہ پر ملاقات کی ہے۔
نجی ٹی وی چینل کے صحافی نے اس حوالے سے بتایا کہ جب علیم خان ملاقات کیلئے گئے تو انہیں گھر کے عقبی دروازے سے اندر داخل کیا گیا اور اس ملاقات کو شیڈول کرانے میں مسلم لیگ پنجاب کے صدر رانا ثنااللہ کا بڑا ہاتھ ہے۔
