خانیوال میں بلاول بھٹو زرداری کی ہمشیرہ آصفہ بھٹو کے زخمی ہونے کے بعد لانگ مارچ اوکاڑہ پہنچنے پر سیکیورٹی ٹیم نے ڈرون کیمرہ توڑ ڈالا ہے۔
خبررساں ادارے کی رپورٹ کے مطابق پیپلزپارٹی کے زیر اہتمام بلاول بھٹو زرداری کی قیادت میں کراچی سے چلنے والا لانگ مارچ اوکاڑہ پہنچا جہاں سیکیورٹی پر معمور ٹیم نے میڈیا کوریج کیلئے اڑائے جانے والے ڈرون کیمرے کو پکڑ کر توڑ ڈلا۔
لانگ مارچ کے منتظمین کا کہنا ہے کہ گزشتہ روز پیش آنے والے واقعہ کے بعد کوریج کیلئے ڈرون کیمرے کے استعمال پر پابندی عائد کی گئی ہے، اوکاڑہ جلسے میں ڈرون کیمروں کی مدد سے کوریج کرنے پر پولیس اہلکاروں کی بھی دوڑیں لگ گئی ہیں۔
یادرہے کہ گزشتہ روز خانیوال میں لانگ مارچ کے پڑاؤ کے موقع پر چیئرمین پیپلزپارٹی بلاول بھٹو زرداری نے شرکاء سے خطاب کرنا تھا جس کی کوریج کیلئے مختلف خبررساں اداروں کی ٹیمیں موقع پر پہنچی ہوئی تھیں، ایسی ہی ایک ٹیم کا ڈرون کیمرہ اڑتا اڑتا سیدھا کنٹنیر پر موجود آصفہ بھٹو زرداری سے جاٹکرایا جس کے باعث وہ زخمی ہوگئیں تھیں۔