مسلم لیگ ن کی نائب صدر مریم نواز شریف بھی تحریک انصاف کی سوشل میڈیا مہم کے حوالے سے بول پڑی ہیں، انہوں نے بھی مریم اورنگزیب کی طرح پی ٹی آئی کی سوشل میڈیا مہم کو جعلی قرار دیدیا ہے۔
مائیکروبلاگنگ ویب سائٹ ٹویٹر پر اپنے سلسلہ وار ٹویٹس میں مریم نواز شریف نے کہا کہ عمران خان کاایک اور جھوٹ پکڑا گیا ہے،جس میں ریاستی اداروں کے خلاف نفرت آمیز مہم اور بیرونی سازش سے متعلق منفی پراپیگنڈہ چند افراد کے ذریعے چلایا جارہا ہے جو سینکڑوں جعلی اکاؤنٹس اور بوٹس کا استعمال کرتے ہیں۔
مریم نواز نے الزام عائد کیا کہ ان جعلی سوشل میڈیا مہم کو براہ راست عمران خان لیڈ کرتے ہیں، ہم نے پی ٹی آئی کی مجرمانہ سرگرمیوں کا سراغ لگالیا ہے جس سے متعلق آئندہ کچھ دنوں میں مزید انکشافات ہوں گے ، اور اس بار کوئی جھوٹ انہیں بچا نہیں پائے گا۔
رہنما ن لیگ نے مزید کہا کہ ان کا مینڈیٹ، لیڈر، بیانیہ اور تبدیلی کے بعد اب اکاؤنٹس بھی جعلی نکلے ہیں، شرم آنی چاہیے۔
مریم نواز نے اس مبینہ جھوٹ پر تحریک انصاف کو آڑے ہاتھوں لیتے ہوئے کہا کہ عمران خان کی حکومت کی طرح ان کا سوشل میڈیا بھی موکلات اور جنات چلا رہے ہیں اسی لیے ان کے جلسوں کی تصاویر خلا (ناسا) سے لی جاتی ہیں۔
مریم نواز نے تحریک انصاف کی جانب سے درست اور جعلی ہیش ٹیگ سے متعلق جاری کردہ ایک پوسٹر بھی شیئر کیا اور کہا کہ ٹویٹر نے ان کے ٹرینڈ کو بین کردیا ہے اسی لیے اب یہ ملتے جلتے ہیش ٹیگز استعمال کررہے ہیں۔
ن لیگی رہنما نے ایک گراف بھی شیئر کیا جو ان کے مطابق ٹرینڈ کی سرگرمیوں کے حوالے سے تھا، مریم نے کہا کہ اس ٹرینڈ کی تمام سرگرمیاں ایک دوسرے سے منسلک تھی یہ قدرتی نہیں تھیں، تمام ٹویٹس، رپلائز اور لائکس وغیر ایک ساتھ اوپر نیچے ہوتے دکھائی دے رہے ہیں۔
مریم نواز نے ٹویٹر پر شروع ہونے والا "جعلی ٹرینڈ پکڑا گیا" کے ٹاپ ٹرینڈ پر تبصرہ کرتے ہوئے کہا کہ چوری اور چور پکڑلیا گیا ہے۔