سوات کی تحصیل اور خوازہ خیلہ میں سول سوسائٹی نے مظاہرہ کرتے ہوئے مطالبہ کیا ہے کہ قانون نافذ کرنے والے ادارے اور حکومت امن وامان قائم کرنے کیلئے متحرک ہوں۔
نجی ٹی وی چینل ہم نیوز کے سوات میں بیورو چیف اور سینئر صحافی شیریں زادہ نے سماجی رابطوں کی ویب سائٹ ٹویٹر پر سوات میں امن و امان کی بگڑتی صورتحال پر مظاہرے کی ویڈیو شیئر کرتے ہوئے لکھا کہ: سوات کی تحصیل کبل اور تحصیل خوازہ خیلہ میں سول سوسائٹی کا امن و امان کی بگڑتی صورتحال کے خلاف مظاہرہ، حکومت اور قانون نافذ کرنے والے ادارے امن و امان قائم کرنے کیلئے کردار ادا کریں۔ سوات میں بد امنی اور دہشت گردی برداشت نہیں کی جائے گی: مظاہرین
سینئر صحافی نے مظاہرین کی ایک اور ویڈیو ٹویٹ کرتے ہوئے لکھا کہ: سوات کے مختلف تحصیلوں میں احتجاجی مظاہرے جاری ہیں!
ایک اور ویڈیو ٹویٹر پر شیئر کرتے ہوئے سینئر صحافی نے لکھا کہ: سوات کی تحصیل خوازہ خیلہ میں عوام سڑکوں پر نکل آئے ہیں اور احتجاج کر رہے ہیں کہ ہمیں ہر صورت میں امن چاہیے!
سابق وفاقی وزیر مراد سعید نے بھی مظاہرین کی ویڈیو ٹویٹر پر شیئر کی اور لکھا کہ : آج میرے گاوں کبل نے بھی امن کے حق اور کسی اور کے لئے ہمیں ایندھن بنانے کے خلاف فیصلہ دے دیا ہے۔ میں آواز اٹھاتا رہا، خدشات بتاتا رہا لیکن امپورٹڈ حکومت شریک جرم اور میڈیا کی ترجیحات الگ ہیں۔
مراد سعید کی جانب سے ٹویٹر پر شیئر کی گئی ویڈیو دیکھا جا سکتا ہے کہ مظاہرین "دہشت گردی نامنظور" کے نعرے لگا رہے ہیں۔
یاد رہے کہ سوات سے حال ہی میں ایک آرمی میجر اور ایک پولیس افسر کو اغوا کیا گیا تھا جس کے بعد حالات کشیدہ ہوتے جا رہے ہیں۔ سوات کی تحصیل خوازہ خیلہ اور کبل میں عوام بدامنی روکنے کے لیے سڑکوں پر نکل آئے، مظاہرین نے احتجاج کرتے ہوئے کہا کہ ہمیں امن چاہیے، ملک کو پھر سے بدامنی اور تشدد کی طرف لے جا نے والے عوامل کا فوری طور پر خاتمہ کرنا ہو گا۔