مسلم لیگ ن کے تاحیات قائد اورسابق وزیراعظم نوازشریف نے شہبازشریف کابینہ بالخصوص وزیراعظم شہبازشریف اور وزیرخزانہ مفتاح اسماعیل سے متعلق گردش کرتی خبروں اور پروپیگنڈا کو مسترد کر دیا۔
نوازشریف نے سماجی رابطے کی ویب سائٹ ٹوئٹر پر اپنی ذاتی اکاؤنٹ سے ایک ٹوئٹ کیا ہے کہ "وزیراعظم شہبازشریف کے بارے میں مجھ سے منسوب منفی تبصرے گمراہ کن اور غلط ہیں۔ مجھے امید ہے کہ انتہائی مشکل حالات میں شہباز شریف کی مخلصانہ اور انتھک کوششیں ثمر آور ہوں گی اور وہ ملک کو عمران خان کے پیدا کردہ بحران سے نکالیں گے"
یاد رہے کہ چند روز قبل معروف تجزیہ کار اور اینکرپرسن سہیل وڑائچ کی نوازشریف سے لندن میں ملاقات ہوئی جس کے بعد مذکورہ صحافی نے ایک نجی چینل کے پروگرام میں دعویٰ کیا کہ نوازشریف، شہبازشریف اور مفتاح اسماعیل سے خوش نہیں ہیں۔
ملاقات کے حوالے سے سہیل وڑائچ کا کہنا تھا کہ نواز شریف معاشی پالیسوں سے بالکل مطمئن نہیں اور وفاقی وزیر خزانہ مفتاح اسماعیل کی کارکردگی انہیں بالکل نہیں بھا رہی، انہوں نے بار بار کہا کہ میں نے تو پہلے ہی کہا تھا کہ حکومت نہ لیں اور الیکشن کی طرف جائیں۔
سہیل وڑائچ نے یہ بھی دعویٰ کیا کہ ایسا لگتا ہے کہ نواز شریف نے ذہن بنالیا ہے کہ اگر کوئی معاشی پالیسی وہ چاہتے ہیں تو وہ اسحاق ڈار ہی کے ذریعے ہوگی، وہ مفتاح اسماعیل پر اعتماد نہیں کررہے اور سمجھتے ہیں کہ وزیرخزانہ کو معاشی پالیسیوں کا اتنا علم نہیں۔
