وزیراعظم عمران خان نے اس عزم کا اظہار کیا ہے کہ ہم افغانستان میں انسانی بحران سے نمٹنے کیلئے آواز اٹھاتے رہیں گے، ساتھ ہی انہوں نے ” سیو افغان لائیوز” کا ہیش ٹیگ متعارف کرادیا۔
وزیراعظم عمران خان نے اتوار کی دوپہر اپنے آفیشل سوشل میڈیا اکاؤنٹ سے ایک ٹرینڈ لانچ کیا جو کہ افغانستان میں جاری انسانی بحران سے بیداری سے متعلق ہے۔
عمران خان کے ٹوئٹ سے کچھ ہی دیر بعد اس ٹرینڈ کی حمایت میں ٹویٹ کرنے والوں کی تعداد میں تیزی سے اضافہ دیکھنے میں آیا اور یہ ٹرینڈ ٹوئٹر پر ٹاپ موضوعات کی فہرست میں آ گیا۔
اپنے ٹوئٹ میں وزیراعظم عمران خان نے ایک افغان بچی کی تصویر شیئر کی جس کے کیپشن میں لکھا کہ میں چاہتا ہوں کہ لوگ افغانستان میں پھیلنے والے انسانی بحران کے بارے میں بیداری پیدا کرنے کی بین الاقوامی مہم میں شامل ہوں، افغانستان میں لاکھوں افغانوں، خاص طور پر بچوں کو فاقہ کشی کا خطرہ لاحق ہے۔
انہوں نے یہ بھی کہا کہ میں نے "افغانوں کی زندگیاں بچاؤ" مہم کی تصویر شیئر کی ہے، اور میں اس مہم میں اپنی آواز بھی شامل کروں گا۔
وزیراعظم کی جانب سے کیے گئے ٹوئٹ کے بعد حکومتی جماعت کے آفیشل اکاؤنٹس سے اور دیگر وزرا، مشیران، سینیٹرز ودیگر سوشل میڈیا صارفین افغانستان کے حق میں ٹوئٹ کرنے لگے۔
واضح رہے کہ وزیراعظم مسلسل عالمی برادری سے اپیل کررہے ہیں کہ بھوک کے دہانے پر لاکھوں افغانوں کو فوری امداد فراہم کی جائے،افغانستان کی مدد کرنا اقوا م متحدہ کےاصولوں کے مطابق فرض ہے۔
وزیراعظم کا کہنا تھا کہ ورلڈ فوڈ پروگرام چیف نے بھی افغانستان میں انسانی بحران پرالرٹ جاری کردیا ہے پاکستان ہر ممکنہ ریلیف فراہم کرتا رہے گا مگر عالمی برادری کواقدام کرناہوں گے ۔