فنانشل ایکشن ٹاسک فورس(فیٹف) کا اجلاس آج سے جرمنی کے شہر برلن میں شروع ہورہا ہے جس میں پاکستان کو گرے لسٹ سے نکالنے یا برقرار کا فیصلہ کیا جائے گا۔
خبررساں ادارے کی رپورٹ کے مطابق پاکستان نے ایف اے ٹی ایف کی 27 میں سے 26 شرائط پر عمل درآمد کرلیا ہے جس کے بعد پاکستان کے گرے لسٹ سے نکلنے کے امکانات روشن ہوگئے ہیں ، پاکستان کو گرے لسٹ میں برقرار رکھنے کیلئے بھارتی سازشیں بھی ناکام بنادی گئی ہیں۔
رپورٹ کے مطابق مودی حکومت نے پاکستان کو گرے لسٹ میں برقرار رکھنے کی سازش کی لیکن پاک فوج نے بروقت اس سازش کو ناکام بنادیا ہے، اس حوالے سے آرمی چیف جنرل قمر جاوید باجوہ کے احکامات پر میجر جنرل کی سربراہی میں قائم کردہ اسپیشل سیل نے مختلف وزارتوں، محکموں اور ایجنسیز کے درمیان کورڈینیشن کا میکنزم بنایا۔
اس سپیشل سیل نے دن رات کی انتھک محنت اور کاوشوں سے دہشت گردی کی فنانسنگ اور منی لانڈرنگ روکنے کیلئے موثر نظام مرتب کیاجس پر عمل درآمد سے اغوا برائے تاوان، بھتہ خوری،ٹارگٹ کلنگ کی روک تھام میں مدد ملی، اس اسپیشل سیل کی کاوشوں سے حوالہ ہنڈی نیٹ ورکس کے خلاف موثر کارروائی کی گئی جبکہ اینٹی منی لانڈرنگ ایکٹ، فارن ایکسچینج ریگولیٹری ایکٹ میں ترامیم سے منی لانڈرنگ کے خاتمے کیلئے 7 سے4پوائنٹس پرنمایاں پیش رفت دیکھی گئی۔
