پیپلز پارٹی کے چیئرمین بلاول بھٹو زردار ی نے سندھ میں گورنر راج لگائے کی تجویز پر نظم شیئر کرتے ہوئے رد عمل کا اظہار کیا ہے۔ انہوں نے ٹوئٹر پر ایک نظم کی ویڈیو شیئر کی ہے جس پر انہوں نے "چلو گورنر راج لگاتے ہیں" کا کیپشن لکھا ہے۔
چیئرمین پی پی پی بلاول بھٹو نے جو نظم شیئر کی اس کے مکمل اشعار درج ذیل ہیں۔
چلو گورنر راج لگاتے ہیں
کل نہیں آج لگاتے ہیں
جو سارے پاکستان میں ہے جاری
سندھ میں بھی وہ ناچ لگاتے ہیں
چلو گورنر راج لگاتے ہیں
ہر وعدے سے مکرنا ، ہر جھوٹ پر اکڑنا
قلندر کی گلیوں میں ایسا رواج لگاتے ہیں
چلو گورنر راج لگاتے ہیں
کب سے کھڑا ہوں لے کر خواہش یہ دل میں
کپتان کے نعرے سر سکھر بیراج لگاتے ہیں
چلو گورنر راج لگاتے ہیں
کیسی جمہوریت کہاں کا ووٹ بینک
انگلی سے انگوٹھے کا علاج کرواتے ہیں
چلو گورنر راج لگاتے ہیں
نااہل، ناکام، بدکردار سندھ حکومت
چند بکے ہوؤں سے احتجاج کرواتے ہیں
چلو گورنر راج لگاتے ہیں
جاؤ کچھ اینکروں کو پیغام دو جاکر
حکومت ہے مکمل اپاہج یہ دکھاتے ہیں
چلو گورنر راج لگاتے ہیں
جو نہ بم سے ڈرا نہ پھانسی سے جھکا
ایسے جیالوں کا مزاج آزماتے ہیں
چلو گورنر راج لگاتے ہیں
وزارتوں کی تختی پر اب ہوگا نام ہمارا
قیمت چاہے جو بھی ہو اندراج کراتے ہیں
چلو گورنر راج لگاتے ہیں
چلو گورنر راج لگاتے ہیں
چلو گورنر راج لگاتے ہیں
بلاول بھٹو نے ایک اور ٹوئٹ میں وزیراعظم عمران خان کو چیلنج کر دیا، انہوں نے ٹویٹر پیغام میں کہا کہ ہمت ہے تو گورنر راج لگا کر دکھاؤ عمران خان۔ کل نہیں بلکہ آج گورنر راج لگاؤ، انشاء اللہ ہم سب یہاں اسلام آباد آکر آپ کو جواب دیں گے۔
واضح رہےکہ سندھ ہاؤس میں پی ٹی آئی کے منحرف ارکان کی موجودگی کے بعد وزیر داخلہ شیخ رشید نے سندھ میں گورنر ہاؤس لگانے کی تجویز دی تھی۔
