ملک کے دیہی علاقوں میں ڈیزل و پیٹرول کی قلت کے حوالے خبروں پر اوگرا نے وضاحتی بیان جاری کردیا ہے۔
تفصیلات کے مطابق آئل اینڈ گیس ریگولیٹری اتھارٹی(اوگرا) کے ترجمان کی جانب سے جاری کردہ بیان میں کہا گیا ہے کہ ملک میں کہیں بھی ڈیزل و پیٹرول کی قلت نہیں ہے، چند مقامات پر ڈیزل کی قلت کے حوالے سے جھوٹی افواہیں پھیلائی جارہی ہیں۔
ترجمان اوگرا نے کہا کہ تمام تر صورتحال پر گہری نظر رکھے ہوئے ہیں، کسی بھی ذخیرہ اندوزی یا پیٹرولیم مصنوعات کی سپلائی میں کسی قسم کی رکاوٹ پر سخت کارروائی عمل میں لائی جائے گی۔
واضح رہے کہ پنجاب کے مختلف دیہی علاقوں میں ڈیزل و پیٹرول کی قلت کے حوالے سے خبریں گردش کررہی تھیں ، گزشتہ روز سابق وفاقی وزیر حماد اظہر نے بھی اس حوالے سے ایک بیان جاری کیا تھا جس میں انہوں نے ڈیزل بحران کی نشاندہی کی تھی ۔
حماد اظہر نے ٹویٹر پرایک ویڈیو شیئر کی جس میں لوگ پیٹرول پمپ پر لائن لگاکر کھڑے نظر آرہے تھے،ویڈیو شیئر کرنے والے ٹویٹر صارف نے لکھا کہ گندم کی کٹائی، کپاس اور چاول کی کاشت کا سیزن ہے مگر کسان ڈیزل کیلئے رل رہے ہیں، بجلی لوڈشیڈنگ سے موٹریں بند ہیں، نہری پانی بھی ابھی تک نہیں آ رہا۔
رہنما تحریک انصاف نے اس معاملے پر اپنا ردعمل دیتے ہوئے کہا تھا کہ ہم اپنےد ور میں ڈیزل کا ذخیرہ بلند ترین سطح 32 کور دنوں پر چھوڑ کر گئے تھے،مگر اس کے باوجود امپورٹڈ حکومت نے باقی معاملات کی طرح اس کو بھی بدانتظامی اور ابہام کی نظر کر دیا۔ مارکیٹ کو متضاد اشارے دیتے رہے اور اب ذخیرہ اندوزی شروع ہو گئی ہے۔
