اینٹی نارکوٹکس فورس نے کراچی بندرگاہ پر پہنچنے والے ایک کنٹینر سے 360 کلو گرام ہیروئن برآمد کرلی ہے۔
خبررساں ادارے کی رپورٹ کے مطابق ہیروئن برطانیہ کیلئے بک کیے گئے سامان سے برآمد کی گئی، یہ کنٹینر کراچی بندرگاہ کے ساؤتھ ایشین پاکستان ٹرمینل پر موجود تھا، اے این ایف انٹیلیجنس اور اے این ایف پورٹ کنٹرول یونٹ نے خفیہ اطلاع ملنے پر کارروائی کی۔
ترجمان اے این ایف کے مطابق خفیہ اطلاع پر کنٹینر کو کھلوایا گیا تو اس میں سینیٹری پائپ موجود تھے جنہیں مشکوک پایا گیا، جب ان پائپس کی تلاشی لی گئی تو ہر پائپ میں سے ہیروئن برآمد ہوئی۔
اے این ایف ترجمان کا مطابق مجموعی طور پر پائپس میں سے 360 کلو گرام ہیروئن برآمد ہوئی، ہیروئن اسمگل کرنے کی کوشش کرنے والے مرکزی ملزمان کی تلاش کیلئے ٹیمیں تشکیل دیدی گئی ہیں۔
اے این ایف کا کہنا ہے کہ ابتدائی تحقیقات میں معلوم ہوا ہے کہ کنٹینر میں بک کروایا گیا سامان کراچی کی ایک مقامی کمپنی کی جانب سے شمالی آئرلینڈ برطانیہ بھجوایا جارہا تھا ۔