2019ء میں کراچی اس انڈیکس میں 140 شہروں میں 136 ویں اور گزشتہ برس 140 شہروں میں 134 ویں نمبر پر تھا: رپورٹ
صوبہ سندھ کے دارالحکومت کو معروف غیرملکی جریدے دی اکانومسٹ کے انٹیلی جنس یونٹ (ای آئی یو) نے ناقابل رہائش شہری مراکز میں شامل کر لیا ہے۔ ای آئی یو کے حالیہ سروے میں پاکستان کے سب سے بڑے شہر کراچی کو 173 شہروں میں سے 169 نمبر پر رکھا گیا ہے۔ سینئر صحافی وتجزیہ کار کامران خان نے دی اکانومسٹ کی رپورٹ سامنے آنے کے بعد سماجی رابطوں کی ویب سائٹ ٹوئٹر پر پیپلزپارٹی کی حکومت پر شدید تنقید کردی۔
کامران خان نے اپنے ٹوئٹر پیغام میں خبر شیئر کرتے ہوئے لکھا کہ: ساری دنیا دیکھ رہی ہے لیکن بلاول بھٹو زرداری کو کوئی پرواہ نہیں! کراچی میں بغیر کسی رکاوٹ کے بھٹو کی حکومت کے 15 سال مکمل ہونے والے ہیںجہاں سندھ کا 95 فیصد ریونیو استعمال ہو رہا ہے لیکن اس کے باوجود کراچی دنیا بھر میں رہنے کے قابل شہروں میں آخری نمبر پر آیا ہے!
انہوں نے وزیراعلیٰ سندھ مراد علی شاہ پر تنقید کرتے ہوئے لکھا کہ: محترم مراد علی شاہ صاحب یہ آپ نے کیا ظلم کیا؟ تاریخ کبھی آپ کو فراموش نہیں کرے گی! چند دنوں میں آپ کی حکومت سندھ کے خزانے پر بلا شرکت غیرے حکمرانی کے 10 سال، وزیر اعلیٰ سندھ بنے 7 سال، سندھ کابینہ وزیر بنے 15 سال پورے ہوجائیں، اقتدار سے آئندہ ماہ شاید جز وقتی رخصتی سے چند روز پہلے دنیا کے نامور ترین جریدے The Economist نے سندھ کے دارلحکومت سندھ خزانے میں 95 فیصد جمع کرانے والے کراچی کو دنیا کے بدترین ناقابل رہائش شہروں کی فہرست کی نچلی ترین سطح میں شامل کرلیا ہے!
کراچی کے 2کروڑ شہری آج بد ترین عالمی اعزاز کی تصدیق کریں گے، نہ پینے کا پانی، نہ پبلک ٹرانسپورٹ، نہ صفائی ستھرائی کاموثر نظام، ٹوٹی پھوٹی سڑکیں، سندھ بلڈنگ کنٹرول اتھارٹی سے لے کر بورڈآف ریوینیو غرض کسی بھی سرکاری دفتر میں بنا اندھادھند رشوت، کام کروا کر دکھائیں تو معجزہ ہوگا، 15 سال اقتدار کا یہ نتیجہ رپورٹ کارڈ سامنے ہے، مورخ رہتی دنیا تک یاد دلاتے رہیں گے
دی اکانومسٹ کی رپورٹ کے مطابق کراچی گلوبل لائیوبلٹی انڈیکس 2023ء میں پاکستان کا واحد شہر کراچی شامل ہے جس کے بعد لاگوس، الجزائر، طرابلس اور دمشق کو سب سے کم قابل رہائش شہروں میں شامل کیا گیا ہے۔ انڈیکس میں دنیا بھر کے شہروں کی کرونا کے بعد بحالی پر توجہ، استحکام، صحت کی سہولیات، ثقافت، تعلیم، ماحولیات کو بنیاد بنا کر شہروں کی درجہ بندی کی گئی ہے۔
رپورٹ کے مطابق گزشتہ ایک سال میں صورتحال میں کوئی تبدیلی نہیں آئی، کراچی کو صحت کی دیکھ بھال کے حوالے سے 50فیصد، ثقافت وماحولیات میں 38.7فیصد تعلیم پر 75فیصد اور انفراسٹرکچر پر 51.8 نمبر ملے ہیں جبکہ مجموعی طور پر 42.5فیصد نمبر دیئے گئے ہیں۔ 2019ء میں کراچی اس انڈیکس میں 140 شہروں میں 136 ویں اور گزشتہ برس 140 شہروں میں 134 ویں نمبر پر تھا۔
