خیبر پختون خوا کے علاقے ہنگو میں تیل و گیس نکالنے والی غیر ملکی کمپنی کی سائٹ پر دہشت گردوں نے حملہ کیا ہے جس کے نتیجے میں چوکیدار جاں بحق جبکہ سپر وائزر کو اغوا کرلیا گیا ہے۔
خبررساں ادارے کی رپورٹ کے مطابق ضلع کرک اور ہنگو کے سرحدی علاقے میں بدھ اور جمعرات کی درمیانی شب عسکریت پسندوں نے تیل و گیس نکالنے والی غیر ملکی کمپنی کی سائٹ پر حملہ کیا، واقعہ کی ذمہ داری کالعدم تحریک طالبان نےقبول کرتے ہوئے سپروائزر کے اغوا کی تصدیق بھی کردی ہے۔
پولیس کے مطابق حملہ آوروں نے کمپنی کے دور دراز پہاڑی علاقے میں واقع کمپاؤنڈ کو جدید خود کار ہتھیاروں سے نشانہ بنایا اور فرار ہوگئے۔
کرک پولیس نے بھی واقعہ کی تصدیق کرتے ہوئے نامعلوم افرا دکے خلاف مقدمہ درج کرلیا ہے، ڈی پی او اکرام اللہ خان نے کہا ہے کہ حملہ آوروں کی گرفتاری کیلئے تلاش شروع کردی گئی ہے۔
وزیراعلی خیبر پختونخوا محمود خان نے واقعہ کا نوٹس لیتے ہوئے پولیس کو صوبے میں تیل و گیس نکالنے والی غیر ملکی کمپنیوں کی سیکیورٹی بہتر بنانے کے احکامات جاری کردیئے ہیں۔
انہوں نے کہا کہ دہشت گرد عناصر ملک و قوم کی ترقی کے دشمن ہیں، مغوی سپروائزر کی بازیابی کیلئے اقدامات کررہے ہیں، آئندہ ایسے ناخوشگوار واقعہ کی روک تھام کیلئے موثر اقدامات اٹھائیں جائیں گے۔