یورپی یونین نے افغانستان اور اس کے پڑوسی ممالک کیلئے 1 ارب یورو (1.2 بلین ڈالر) کا امدادی پیکج فراہم کرنے کا اعلان کیا ہے۔
تفصیلات کے مطابق یورپی یونین نے افغانستان میں بڑھتے ہوئے انسانی، سماجی اور معاشی بحران کے پیش نظر امدادی پیکج کا اعلان کر دیا، یورپی کمیشن کی سربراہ ارسولا وان ڈیر لیین نے جی20 سمٹ کے دوران امداد کا اعلان کیا۔
یورپی یونین کے بیان کے مطابق افغانستان کی انسانی ضروریات کو پورا کرنے کے لیے پہلے سے اعلان کردہ 25کروڑ یوروز کی رقم میں مزید 30کروڑ یوروز کا اضافہ کر دیا گیا ہے جبکہ باقی رقم افغانستان کے ان پڑوسی ممالک کو دی جائے گی جہاں لوگ طالبان کے اقتدار میں آنے کے بعد بطور مہاجرین جا رہے ہیں۔
ان کے بیان میں اس بات پر زور دیا گیا کہ یورپی یونین کے فنڈز افغانوں کے لیے ’’ براہ راست مدد ‘‘ ہیں اور یہ وہاں پر کام کرنے والی بین الاقوامی تنظیموں کو بھیجے جائیں گے۔
صدریورپی کمیشن کا کہنا تھا کہ افغانستان کو انسانی، سماجی و معاشی تباہی سے بچانے کیلئے ہرممکن کوشش کرنا ہوگی۔