قومی فاسٹ باؤلر نسیم شاہ کو اسلام آباد یونائیٹڈ نے ساڑھے چار کروڑ روپے کے عوض اپنی ٹیم میں شامل کیا ہے۔
تفصیلات کے مطابق گزشتہ سیزن میں کوئٹہ گلیڈی ایٹرز کی نمائندگی کرنے والے نسیم شاہ سے کئی فرنچائزز سیزن 9 کیلئے معاہدے کے خواہش مند تھے، تاہم نسیم شاہ کو اپنی ٹیم میں شامل کرنے والی ٹیم اسلام آباد یونائیٹڈ رہی جس نےساڑھے 4 کروڑ روپے میں نسیم شاہ کو اپنا بنایا۔
ذرائع کا کہنا ہے کہ پی ایس ایل سیزن 9 کیلئے پلیئرز کی ریٹینشن کا اعلان 7 دسمبر کیا جائے گا، فرنچائزز ہر کیٹیگری کو مدنظر رکھتے ہوئے 8، 8 کھلاڑیوں کو ٹیم میں برقرار رکھ سکیں گے۔
پی ایس ایل سیزن 9 کیلئے ابھی تک بجٹ اور سیلری کیپ کا فیصلہ نہیں ہوسکا ہے، گزشتہ سیزن میں سیلری کیپ 13 لاکھ ڈالر فی ٹیم تھا۔
ذرائع کا کہنا ہے کہ سیزن 9 کیلئے ایک مسئلہ شیڈولنگ کا بھی کھڑا ہوچکا ہے، پی سی بی نے مجوزہ شیڈولز فرنچائزز کو بھیجے ہیں، ایک شیڈول میں چار جبکہ دوسرے میں 2 وینیوز شامل کیے گئے ہیں، پنجاب میں سخت سرد موسم اور دھند کے باعث بورڈ کو یہ تجویز دی گئی ہے کہ ایونٹ کا آغاز کراچی سے ہو اور اختتام پنجاب میں کیا جائے، تب تک پنجاب میں موسم بہتر ہوجائے گا۔
