مشہور ہالی ووڈ اداکار آرنلڈ شیواز نیگر کو جرمنی کے ایک ایئرپورٹ پر مبینہ ٹیکس چوری کے جرم میں گرفتار کرلیا گیا ، ایئرپورٹ حکام نے جرمانے کی ادائیگی کے بعد ہالی ووڈ اسٹار کو رہا کیا۔
غیر ملکی خبررساں ادارے کی رپورٹ کے مطابق مشہور ہالی ووڈ سریز ٹرمینیٹر جیسی کئی ایکشن فلموں میں اپنی اداکاری کے جوہر دکھانے اور امریکی ریاست کیلیفورنیا کے سابق گورنر آرنلڈ شیواز نیگر کو میونخ ایئرپورٹ پر کسٹمز آفس نے گرفتار کیا۔
رپورٹس کے مطابق آرنلڈ کو اس میونخ ایئرپورٹ پر کسٹمز حکام کی جانب سے تلاشی لیتے ہوئے اس وقت گرفتار کیا گیا جب ان کے سامان میں سے ایک بیش قیمتی سوئس گھڑی برآمد ہوئی جس کی مالیت تقریبا26ہزار یورو بتائی جاتی ہے۔
میونخ ایئرپورٹ کے کسٹمز حکام کے مطابق آرنلڈ نے جرمنی آنے سے پہلے اپنے اثاثوں میں اس قیمتی گھڑی کا ذکر نہیں کیا ، یہ ایک ایسی چیز ہے جو یورپی یونین کے باہر سے امپورٹ کی گئی اور غیر رجسٹرڈ ہے، لہذا آرنلڈ کے خلاف ٹیکس چھپانے کے الزام کے تحت قانونی کارروائی عمل میں لائی جائے گی۔
آرنلڈ نے کسٹمز حکام کو وضاحت دینے کی کوشش کی کہ یہ گھڑی وہ ماحولیات کے حوالے سے منعقد ہونے والی ایک تقریب میں عطیہ کرنا چاہتے ہیں مگر ان کی یہ وضاحت قبول نہیں کی گئی اور ایئرپورٹ حکام نے آرنلڈ پر 4 ہزار یورو ٹیکس سمیت 35ہزار یورو کا جرمانہ عائد کیا اور انہیں فوری طور پر کریڈٹ کارڈ کے ذریعے یہ جرمانہ ادا کرنے کی ہدایت کی۔
ایئرپورٹ پر معاملات اس وقت دلچسپ صورتحال اختیار کرگئے جب آرنلڈ نے جرمانہ ادا کرنے کی حامی بھر مگر اس موقع پر کریڈٹ کارڈ مشین جواب دے گئی جس کے بعد انہیں قریبی اے ٹی ایم مشین تک لے جایا گیا جہاں سے اتنی مالیت کی رقم نہیں نکلوائی جاسکی۔
بعد ازاں ایئرپورٹ پر دوسری کریڈٹ کارڈ مشین لائی گئی جس کے ذریعے آرنلڈ نے ٹیکس اور جرمانے کی رقم ادا کی اور 3 گھنٹے کے بعد کسٹمز حکام کی حراست سے رہا ہوکر ایئرپورٹ سے باہر آئے۔
