موجودہ حکومتی اتحاد پاکستان ڈیموکریٹک موومنٹ کے سربراہ مولانا فضل الرحما ن نے صدر مملکت کا عہدہ نہ ملنے پر ملک میں فوری انتخابات کروانے کا مطالبہ کردیا ہے۔
خبررساں ادارے ڈان نیوز کی رپورٹ کے مطابق موجودہ حکومتی سیٹ اپ میں پی ڈی ایم کے سربراہ صدر کے عہدے کے امیدوار بنے ہوئے ہیں تاہم دوسری جانب پیپلزپارٹی کے شریک چیئرمن آصف علی زرداری بھی اس حکومت سے صدارت کا مطالبہ کررہی ہے۔
رپورٹ میں دعویٰ کیا گیا ہے کہ مولانا فضل الرحمان نے حکومت کو یہ پیغام دیدیا ہے کہ اگر مولانا فضل الرحمان کو صدارت نہ ملی تو صرف بطور حکومتی اتحادی اپنی حمایت جاری رکھیں گے ، مولانا فضل الرحمان نے صدارتی کرسی نا ملتے دیکھ کر حکومت سے ملک میں فوری عام انتخابات کروانے کا مطالبہ بھی کردیا ہے ۔
صحافی جاوید حسین نے اس حوالے سے اپنی معلومات شیئر کرتے ہوئے کہا کہ مولانا نے اپنے اصولی موقف کے حوالے سے 2 بڑی جماعتوں کو آگا ہ کردیا ہے اور کہا کہ ہے کہ ہمیں عددی اکثریت کی باتیں نہ بتائیں، اس تحریک میں 2018 سے موجود ہیں اور اسی لحاظ سے ہم سینئر بھی ہیں، اگر موقف تسلیم نہیں کیا جاتا تو ملک میں فوری انتخابات کا اعلان کیا جائے۔
دوسری جانب وفاقی کابینہ کی تشکیل اور دیگر عہدوں کے حوالے سے ن لیگ اور پیپلزپارٹی میں تاحال ڈیڈ لاک برقرار ہے، پیپلزپارٹی نے ن لیگ سے چاروں صوبوں کی گورنر شپ کے علاوہ وفاقی کابینہ میں تین اہم وزارتیں بھی مانگ لی ہیں، جبکہ اے این پی گورنر خیبر پختونخوا اور جے یو آئی ف گورنر بلوچستان کے عہدوں کی مانگ کررہی ہے۔