پاکستان سپر لیگ 7 میں مسلسل آٹھ میچز میں شکست کا سامنا کرنے والی ٹیم کراچی کنگز کے صدر اور سابق کپتان وسیم اکرم نے بابر اعظم کے معاملے پر وضاحت پیش کر دی۔
وسیم اکرم نے وضاحت دیتے ہوئے کہا کہ میں نے بابراعظم سے سوال کیا تھا کہ "کیا ہمارے بولرز یارکرز گیندیں بالکل نہیں کرا سکتے؟"
سوئنگ کے سلطان نے مزید کہا کہ میں نے پوچھا تھا کہ ہمارے بولرز آف سائیڈ پر سوئنگ کیوں نہیں کروا رہے۔ بابر بہترین کھلاڑی ہے اور وہ اپنی پوری کوشش کررہا ہے۔
وسیم اکرم نے وضاحت دیتے ہوئے کہا کہ اس وقت بولروں کے علاوہ کوئی اور بات نہیں ہوئی تھی کیونکہ بولرز کو ٹارگٹ کا دفاع کرنا چاہیے تھا۔
یاد رہے کہ کراچی کنگز اور ملتان سلطانز کے میچ کے آخری اوور میں باؤنڈری لائن پر وسیم اکرم کی بابراعظم سے گفتگو کی ویڈیو سوشل میڈیا پر وائرل ہوئی تھی۔
جس میں یوں لگ رہا تھا جیسے مسلسل ہار کی وجہ سے وسیم اکرم بابراعظم پر برہم ہو رہے ہیں۔
سوشل میڈیا صارفین کا اس ویڈیو سے متعلق کہنا تھا کہ وسیم اکرم اپنی بولنگ کوچ کی ذمہ داری نہیں نبھا پا رہے اور اس کا غصہ بابر پر نکال رہے ہیں۔
گزشتہ روز ملتان سلطانز نے کراچی کنگز کو7 وکٹوں سے شکست دی جس کا فیصلہ آخری اوور میں ہوا تھا۔