غیر ملکی خبر رساں اداروں کے مطابق ٹک ٹاک پر امریکا کے اسکولوں کو بم سے اڑانے کی دھمکی کے بعد فوری تحقیقات کا آغاز ہوا تو مختلف ریاستوں میں اسکول بند کر دیئے گئے اور سیکیورٹی میں بھی اضافہ کر دیا گیا۔ ٹک ٹاک ویڈیو میں کہا گیا تھا کہ جن کو اپنی جان پیاری ہے وہ جمعہ کو سکول نہ جائیں۔
امریکی میڈیا کے مطابق کیلفورنیا، منی سوٹا، ٹیکساس، میسوری میں آج اسکول بند رہیں گے، پولیس کی جانب سے امریکہ کی ریاستوں کے اسکولز میں سیکیورٹی ہائی الرٹ کردی گئی۔
تاہم نیو جرسی کے گورنر نے کہا کہ چونکہ ان کی ریاست میں خطرہ نہیں ہے اس لے وہ اسکولوں کو کھولنے کی ہدایات جاری کرتے ہیں مگر وہ قانون نافذ کرنے والے اداروں کے ساتھ رابطے میں ہیں۔
دوسری جانب ٹک ٹاک کی جانب سے دھمکی آمیز ویڈیو وائرل ہونے سے معاملے پر ایک وضاحتی ٹوئٹ جاری کی گئی ہے جس میں کہا گیا ہے کہ وہ سیکیورٹی اداروں کے ساتھ بھرپور تعاون کیلئے تیار ہیں۔
پلیٹ فارم کی جانب سے جاری پیغام میں کہا گیا ہے کہ اس دھمکی آمیز ویڈیو کی صداقت سے متعلق کچھ نہیں کہا جا سکتا مگر پھر بھی اس معاملے کو سنجیدگی سے دیکھ رہے ہیں۔
