پاکستان کے مشہور فلمی اداکار شان نے شاہ محمود قریشی پر تنقید کرنے والےرؤف کلاسراکو کرارا جواب دیدیا ہے۔
تفصیلات کے مطابق سینئرصحافی و تجزیہ کار رؤف کلاسرانے ٹویٹر پر اپنی ٹویٹ میں وفاقی وزیر خارجہ شاہ محمودقریشی کی اسپیکر پنجاب اسمبلی چوہدری پرویز الہیٰ سے ملاقات کے دوران کھینچی گئی ایک تصویر شیئر کی جس میں شاہ محمود قریشی کو چوہدری پرویز الہیٰ کے سامنے ایک ٹانگ پر ٹانگ رکھ کر بیٹھا دیکھا جاسکتا ہے۔
رؤف کلاسرا نے یہ تصویر شیئر کرتے ہوئے اس پر تبصرہ کرتے ہوئے کہا کہ چوہدری پرویز الہیٰ کو ابھی بھی بیٹھنے کے آداب زیادہ بہتر انداز میں آتے ہیں۔
رؤف کلاسرا کی اس ٹویٹر پرردعمل دیتے ہوئے پاکستان فلم انڈسٹری کے ہیرو شان شاہد نے کہا کہ"بیٹھنے کے آداب تو ہر کوئی سیکھ لیتا ہے، اس وقت ساتھ کھڑے ہونے کے آداب زیادہ ضروری ہیں"۔
واضح رہے کہ گزشتہ روز وزیراعظم عمران خان کی ہدایات پر تحریک انصاف نے اسلام آباد میں ایک تاریخی جلسے"امر بالمعروف" کا انعقاد کیا، سوشل میڈیا پر اس جلسے میں شرکت کیلئے پی ٹی آئی رہنماؤں کے ساتھ ساتھ شوبز انڈسٹری سے تعلق رکھنے والے متعدد ستاروں نے عوام کو نا صرف جوش دلایا بلکہ اس جلسے کو موجودہ صورتحال میں ذریعہ نجات بھی قرار دیا۔