پاکستان مسلم لیگ ق کے رہنما مونس الہیٰ نے قومی اسمبلی میں قائد حزب اختلاف راجا ریاض سے "حکومت اپوزیشن" کی اصطلاح کی وضاحت مانگ لی ہے۔
تفصیلات کے مطابق راجا ریاض نے جیو نیوز کے پروگرام "کیپٹل ٹالک" میں خصوصی شرکت کی، پروگرام کے دوران میزبان حامد میر نے سوال کیا کہ آپ نے پی ٹی آئی کے ٹکٹ پر الیکشن جیتا تھا اور اب آپ نے پی ٹی آئی کا ساتھ چھوڑ دیا ہے تو آپ کوقومی اسمبلی کی نشست سے استعفیٰ دے کر دوبارہ الیکشن نہیں لڑنا چاہیے تھا؟
راجا ریاض نے حامد میر کے سوال کے جواب میں کہا کہ جب اگلا الیکشن آئے گا تو ہم ضروری پی ٹی آئی کے علاوہ کسی دوسری پارٹی کے ٹکٹ پر الیکشن لڑیں گے، ابھی تک تو ہم "حکومت اپوزیشن" میں بیٹھے ہوئے ہیں۔
مسلم لیگ ق کے رہنما اور رکن قومی اسمبلی مونس الہیٰ نے اس گفتگو کا چھوٹا سا ویڈیو کلپ شیئر کیا اور کہا کہ راجا صاحب یہ حکومت اپوزیشن کیا ہوتا ہے؟
انہوں نے مزید کہا کہ اگر آپ میں ہمت ہے تو استعفیٰ دیں اور پی ڈی ایم کی ٹکٹ پر الیکشن لڑیں، انشااللہ آپ کی ضمانت ضبط ہوگی۔
دنیا نیوز کے معروف صحافی خاورگھمن نے راجہ ریاض کی گفتگو پر تبصرہ کرتے ہوئے کہا کہ راجہ ریاض صاحب فرماتے ہیں آئندہ انتخابات انہوں نے نون لیگ کے ٹکٹ پر لڑنا ہے لیکن اس وقت تک وہ لیڈر آف دی اپوزیشن رہیں گے اور نون لیگ کے صدر اور موجودہ وزیر اعظم شہباز شریف جن سے وہ ٹکٹ لیں گے، ان پر تنقید کرتے رہیں گے۔
انہوں نے مزید کہا کہ ویسے ہمارے سیاسی لیڈران قوم کو کتنا بیوقوف سمجھتے ہیں