قومی اسمبلی میں اپوزیشن لیڈر شہباز شریف کو سابق صدر اور پیپلزپارٹی پارلیمینٹرین کے شریک چیئرمین آصف علی زرداری کا حالیہ بیان پسند نہ آیا۔
انہوں نے اس پر ردعمل دیتے ہوئے کہا کہ زرداری صاحب کا میاں نواز شریف کے بارے میں بیان افسوسناک ہے۔ میاں صاحب کی پاکستان کے ساتھ غیر متزلزل وابستگی ہمیشہ سے ناقابل تردید رہی ہے۔
شہباز شریف نے سماجی روابط کی ویب سائٹ ٹوئٹر پر کہا کہ زرداری صاحب کا میاں نواز شریف کے بارے میں بیان افسوس ناک ہے۔ میاں صاحب کی پاکستان کے ساتھ غیر متزلزل وابستگی ہمیشہ سے ناقابل تردید رہی ہے۔ زرداری صاحب جانتے ہیں کہ نواز شریف کو کن حالات میں بیرون ملک جانا پڑا۔
انہوں نے یہ بھی کہا کہ ہمیں ایسے ریمارکس سے گریز کرنا چاہیے اور ملک کی بہتری کے لیے ملکر کام کرنا چاہیے۔
یاد رہے کہ بلاول ہاؤس میں پارٹی رہنماؤں اور کارکنوں کے اعزاز میں دیئے گئے اعشایئے کے دوران میڈیا سے گفتگو کرتے ہوئے آصف زرداری نے کہا تھا کہ ن لیگ والوں نے اپنے حساب سے گلیاں، محلے، برادریاں دیکھ کر حلقے بناۓ ہیں ، لاہور ہی نہیں انہوں نے پورے پنجاب میں حلقے بنائے، انشااللہ یہ حلقے ہم تبد یل کر یں گے۔
انہوں نے کہا کہ ہر جگہ پر ہم الیکشن لڑیں گے ، ہر محلے میں ان سے لڑیں گے ، یہ پاکستان کے خلاف ہیں یہ میری دھرتی کے خلاف ہے جو اس دھرتی میں مرنا نہیں چاہتا اس کو کیا مسئلہ ہے۔ سابق صدر کا کہنا تھا کہ 2008ء میں الیکشن جیتنے کے بعد ہم کامیابی کی طرف جارہے تھے لیکن اس کے بعد آر او الیکشن کرا دیئے گئے۔
انہوں نے یہ بھی کہا کہ آراو الیکشن کرا کر ہم سے انتخابات چھینے گئے۔ پاکستان بہت بڑی سازش کی وجہ سے بہت بڑے خطرے میں ہے، دنیا پاکستان کو توڑنا چاہتی ہے ہم نے بچانے کا عہد کیا ہے۔ اب بھی میرے دماغ میں ایسی سوچ ہے جو ملک کو کامیاب بنا سکتی ہے۔