حکومت مخالف اتحاد (پاکستان ڈیموکریٹک موومنٹ) میں شامل اپوزیشن جماعتوں نے اپنا ایک منشور جاری کر دیا ہے جس میں پی ڈی ایم نے کہا ہے کہ تحریک عدم اعتماد کو کامیاب بنا کرایسا پاکستان تشکیل دیں گے جہاں آئین کی حرمت مقدم ہو، تمام ادارے ایک منتخب انتظامیہ اور پارلیمان کے تابع ہوں گے۔
ایکسپریس نیوز کے مطابق پی ڈی ایم کے جاری کردہ "قوت اخوت عوام چارٹر" میں مزید کہا گیا ہے کہ اب یہ جماعتیں جو ملک بنانے جا رہی ہیں وہاں عوام کو یہ اختیار حاصل ہو گا وہ اپنے آزادانہ حق رائے دہی کے ذریعہ انہیں منتخب اور رخصت کر سکیں۔
اس حوالے سے پی ڈی ایم نے ایک باقاعدہ اعلامیہ جاری کیا ہے جس میں کہا گیا ہے کہ آزادانہ اور منصفانہ انتخابات کو یقینی بنانے کیلئے اتفاق رائے سے انتخابی اصلاحات کو نافذ کیا جائیگا، سیاست سے ہر قسم کی غیر جمہوری مداخلت ختم کریں گے۔
اس منشور کے مطابق پی ڈی ایم نامی یہ اپوزیشن اتحاد میڈیا پہ عائد تمام پابندیاں ختم کرائے گا، کالے میڈیا قوانین کو ختم اور غیر جمہوری مداخلت کا نظام بند کرایا جائے گا۔ یہی نہیں تمام لاپتہ افراد کی بازیابی کے لیے بھی ٹھوس اقدامات اٹھائے جائیں گے۔
متحدہ اپوزیشن کا یہ بھی کہنا ہے کہ شفاف احتساب کے لئے غیر جانبدارانہ ادارہ قائم کرکے کرپشن کا سدباب کیاجائے گا آزاد خارجہ پالیسی کے ذریعہ ایک باوقار اور خود مختار ریاست کے طور پہ عالمی سطح پر پاکستان کو منوایا جائے گا۔
تاہم احتساب کیلئے موجودہ نیب کے ادارے کو ہی استعمال کیا جائے گا یا کوئی نیا منصوبہ یا ادارہ قائم ہو گا اس حوالے سے پی ڈی ایم نے کچھ نہیں کہا۔ جب اس اتحاد کی قیادت کرنے والے مولانا فضل الرحمان کہہ چکے ہیں کہ نیب کو فوری طور پر ختم ہو جانا چاہیے۔