پاکستان تحریک انصاف نے سابق وفاقی وزیر شیریں مزاری کی گرفتاری کے خلاف عدالت سے رجوع کرلیا ہے، اسلام آباد ہائی کورٹ نے رات ساڑھے گیارہ بجے درخواست سماعت کیلئے مقرر کردی ہے۔
تفصیلات کے مطابق تحریک انصاف نے درخواست اسلام آباد ہائی کورٹ میں جمع کروائی، درخواست پر سماعت کیلئے چیف جسٹس اسلام آباد ہائی کورٹ نے آج ہی فیصلہ کرتے ہوئے رات ساڑھے 11 بجے عدالت لگانے کی ہدایات جاری کردی ہیں۔
عدالت نے درخواست پر سماعت کیلئے سیکرٹری داخلہ، آئی جی اسلام آباد، ڈپٹی کمشنر اسلام آباد کو طلب کرلیا ہے۔ درخواست اسلام آباد ہائی کورٹ پہنچتے ہی انسٹیٹیوشن برانچ کا عملہ چھٹی پر جانے کے بعد دوبارہ عدالت پہنچ گیا تھا۔
واضح رہے کہ پاکستان تحریک انصاف کی رہنما کو اینٹی کرپشن پنجاب کی ٹیم نے اسلام آباد سے گرفتار کیا، ان پر ڈپٹی کمشنر راجن پور کی درخواست پر مقدمہ درج کیا گیا ہے جس میں ان پر زمینوں پر ناجائز قبضوں کا الزام عائد کیا گیا ہے۔
دوسری جانب ن لیگ کی حکومت نے شیریں مزاری کی گرفتاری سے اعلان لاتعلقی کرتے ہوئے کہا ہے کہ اس گرفتاری سے حکومت کا کوئی لینا دینا نہیں ہے ان پر زمینوں کے ناجائز قبضے کا الزام ہے۔
تحریک انصاف نے گرفتاری کو چیلنج کرتے ہوئے ملک گیر احتجاج کی کال دیدی ہے اور پارٹی رہنماؤں کواسلام آباد کے تھانہ کوہسار کے باہر جمع ہونے کی ہدایات جاری کردی ہیں۔